اللغز

الأسبوع الماضي كان لغز الأسبوع من طرح الشاعر أحمد بن ناصر المحرج من الرياض والذي يقول:
يا ناس خلوني ترى الراس محتاس
شوفه غريبه شفتها وازعجتني
ورع وشفته ناحل الجسم له راس
ولا له عيون وشوفته حيرتني
ويشابهه بنت لها جسم حساس
بعين وحده دون راس اشغلتني
ومع وصول أكثر من مائة وثمانين حلاً إلاّ أنه لم يصل للحل إلاّ عدد قليل من الشعراء:
يا أحمد المحرج بيوتك على الراس
فريقها والقافيه هيضتني
الورع دبوس يشبك بقرطاس
والبنت الابره بالخيوط ابلشتني
علي رشيد الرشيد - رياض الخبراء
دبوس والدبوس معروف له راس
والابره اللي عينها بهذلتني
لاجيت اركب خيطها راسي انحاس
واللغز جيد والبيوت اعجبتني
محمد أبو دحيم - البدائع
مني لابو ناصر سلام من الراس
اللي بيوته وافيه واعجبتني
هذا هو الدبوس يا طيب الناس
وهذي حلوله بينه ما خفتني
والبنت الابره واضحه مالها راس
عصر الجدود الماضيه ذكرتني
محمد بن عبدالعزيز الخنيفر - أشيقر
سلمت ياللي تازن اللغز باقياس
البنت ابرة قد مضى واغرزتني
وذاك دبوس يشبك بقرطاس
هذا جوابه فكرته وارمعتني
حمد عبدالله الوابلي - حوطة سدير
يا مرحبا ترحيبة العود بدباس
باللي بيوته باللغز هيضتني
الحل دبوس بلاعين له راس
وابرة بعين بدون راس ومتني
هات القلم واكتب جوابي بقرطاس
وقل للمحرج حيرته تعبتني
الراس للدبوس وابره مع الناس
في عينها خيط تجره وتبني
فهد بن عقيل الطويان - بريدة
يا مرحبا ترحيبة عد الانفاس
في ناصر الي ارسالته ابهجتني
حليته الدبوس حذرات ينداس
يوم الابر ضيعتها واقلقتني
سعد مويزر مشعان البدراني - القصيم، الرس
يا مرحبا حييت يا طير قرناس
جمل تحية والبيوت أعجبتني
الحل بالدبوس واللغز لا بأس
والثانية ابره ترى أتعبتني
صلاح بن عبدالله اليابس - رحيمة
تنويه
سوف تتوقف زاوية اللغز حتى عودة الزميل عادي الشمري من إجازته السنوية إن شاء الله.