اللغز

الأسبوع الماضي كان لغز الأسبوع من طرح الشاعر مرتاح سبهان البدراني من الزلفي والذي يقول:
يا ربعنا يا اللي تحلون الألغاز
يا أهل الوفا والمعرفه والمكانه
يا ويش رجل يرتكي فوق معكاز
وإن طاح معكازه يطيح بمكانه
وقد توصل للحل شعراً:
يا مرحباً بك عد ما يطرح الغاز
واللغز لا من حل يطلق أعنانه
لغزك غطاء الكبوت يلزمه مركاز
لا نام مركازه يعود مكانه
محمد بن عبدالرحمن أبو دحيم
البدائع
مرتاح بن سبهان لغزك لنا جاز
في مركز الخدمه لقينا بياناه
شالو غطا الكبوَّت للزيت والغاز
وقت الهبايب لا يغرنك أمانه
فهد بن عقيل الطويان - بريدة
ذاك الرجل واضح ولا هوب يعتاز
يسمونه (الكبوت) عند الصيانه
على عصى وإلا على زر نقاز
لا صار مقفل يعجبك بلمعانه
ياسر الهمزاني - الرياض
اللي يحل اللغز يفرح إلى فاز
مثل الذي يسبق بصهوة حصانه
واللغز حله لا خرب عندك الغاز
ارفع (غطا الكبوت) وافحص مكانه
علي رشيد الرشيد - رياض الخبراء
يا مرحبا يا مسوي اللغز ممتاز
في صفحة فيها الشرف والأمانه
الحل عندي عارف حل الألغاز
هذا (غطا الكبوت) جاكم بيانه
فالح غازي الحربي - رياض الخبراء
اللغز يا البدراني رايع وممتاز
مركازك المربوط واضح مكانه
يمسك غطاء الكبوت عن كل هزاز
وحيان ذا المركاز ما هو تكانه
آمنة محمد العطيفي
القصيم
انا لقيت الحل واللغز ممتاز
كبوت سياره ولابه ليانه
معه العصا ينهضه يا راع الألغاز
نحيل ما يحتاج فك وصيانه
أنس عبدالعزيز المزيرعي
بريدة
وديت حلي للخزامى ببرواز
سهم أخذته من سهام الكنانة
حليته الكبوت والحل ممتاز
على العصا تقل إنها الخيزرانة
سعد مويزر مشعان البدراني - الرس
لغز الأسبوع
كتبه للصفحة الشاعر عبدالله الصالح الأطرش من الرس ويقول:
أنا بنشدك عن بنت تصيد اللي ردى حظه
لها عين ومربوطه ولا توجد بديرتنا
لها فعل إلى بين عليه الناس مكتظه
نجيب ألغاز مليانه ولا نبخل بعادتنا
نستقبل الحلول على الفاكس
4871070أو الإيميل: khozama@alriyadh.com
كما نرحب بطرح لغز الأسبوع.