صوت الصورة

الله يا محلي حياة البوادي
ويازينها البران جو وطبيعه
والخبزه اللي يمسكو بالايادي
أفضل من البرجر ووجبه سريعه
صالح علي أحمد المرفدي - القطيف
سبحان من بالألف خلال عطايا الله
تألف كبار ون شبه عمر الازهار
لكنها ما تالف الشبك لله
الفها الفيافي والبراري والاقفار
سعود عائش الحربي
الخبز يابس والولد طقه الجوع
واخوه الآخر لاهي بالقراميش
وابوهم اللي مشغله جملة ربوع
يم المزاين ينظرون المباهيش
حمد عبدالله الوايلي
- حوطة سدير
الخبز يابس والبعارين جوعى
حسبي على اللي غلى كيس الشعيري
لافيه عشب وايضا لافيه مرعى
كيف السعر يرفع وكيفه يصيري
عبدالرحمن بن منصور التركي
- البكيرية
عربنا له هوايه بالبراري ما يخليها
الايازين جو يجمع العربان والخلان
مابين صغارهم وكبارهم دايم باراضيها
بيوت الشعر مبنيه وتشوف من الحلال الوان
محمد بن عبدالعزيز الخنيفر - أشيقر
طفلين جو من صبح للجنادريه
فطورهم خبزه ولاحولها ايدام
مشتاقين لشوف اهل العزوم القويه
اجدادنا اللي وقفوا بوجه الاعوام
خالد بن ناصر المخيمر - روضة سدير
بالعافيه يالذي تاكل من الخبزه
في مهرجان الحضاره بالجنادريه
يازينها فترة ياحلوها حزه
كني الذي زارها يرجع وراميه
نايف حمود النافع
محلى الولد عايش على كسرة الخبز
اقول له يهناك صحه وعافيه
هذي هي الراحه وهذا هو العز
عيشه هنيه تحت خيمه بباديه
عمر حسين المرفدي - الرس
البل ترازم لابه علف ولابه شعير
في شبك على الطريق كل يمره
ماعندها الا طفل سنه صغير
بيده خبزه والبل ماهمته بالمره
محمد سعد شبيب القحطاني - الرياض
اشرب حليب(ن) من الخلفات
واترك زمان مضى اوفاتي
انتا بديرة هل الخيرات
ما احدن من الجوع قدماتي
عبدالكريم عبدالرحمن السلوم - القرائن
صورة العدد
نرحب بمشاركاتكم الشعرية على الفاكس 4871070
أو الايميل الخاص بصحفة الخزامى: rb-khozama@alriyadh.com
زاوية (صوت الصورة).. ويا هلا