صوت الصورة

يا راعي الددسن تبي الحق غلطان
بالحوض تنقل لك صغاراً مساكين
حتى ولوك باخص الدرب فهمان
لا تامن الساموح يفجعك بالشين
صالح عبدالعزيز السويح - روضة سدير
شفت العراوي في ظهرها وغادين
هاذي وسيلة بس ما هي ملاهي
بعض التصرف مثل شغل المجانين
أرجوك لا تسرع ترى الطفل ساهي
عبدالرحمن بن منصور التركي - البكيرية
يا ناقل الطلاب في حوض نيسان
أحذر ترى ما كل مره سلامه
طلابنا في كل محفل لهم شان
وتاريخنا في الطب أكبر علامه
سعد الحماد - روضة سدير
بشويش يا طفلٍ على الباب بشويش
خلك ذهين وروح جنب الغماره
وكانك تبي تسلم مع الناس وتعيش
أنزل مدام أنك على أطراف حاره
يوسف مرزوق البجيدي - عرعر
موتر قوي والدليل واضح
امة محمد على ظهره يشيله
بلغ اللي عليه تراك طايح
مع لفةٍ صعبه أو خفه الميله
تركي سليمان العندس - الرياض
يا بني آدم ترى فعلك خطير
تسعة أطفال وفي عمر الزهور
كيف تفرحهم وهذا ما يصير
تذهب الفرحه بلحظه والسرور
محمد بن عبدالعزيز الخنيفر - أشيقر
لا تركب الاطفال في حوض مكشوف
حافظ عليهم حطهم بالغماره
هذا خطر وافعل بالاطفال معروف
ولا تعرض الاطفال لبرد وحراره
عقلا خزن العنزي - تبوك
ددسن حشرفي حوضها عشرة أطفال
حياتهم عرضه للأخطار والموت
صوره لها عنوان تفريط وإهمال
يا مرسل الصوره عطيناك له صوت
فهد بن عقيل الطويان - بريدة
يا راعي الددسن عليك الهون
وأحرص على اللي أبصندوقه
ركابكء أصغار ما يدرون
يوم الخطر جنبه أوفوقه
عبدالكريم عبدالرحمن السلَّوم - القرائن
يا محمل الاطفال في ظهر ددسنك
أرجوك وقف قبل شياً يصيري
هذا غلط واللي يشوفك يكرهك
تفريط بصغار السن أمره خطيري
فايز فرحان السويلم - فيضة بن سويلم
أحرص على عيالك معك دوم قدام
تراك ما تدري وش اللي يسوون
وان كان حدتك الليالي والايام
ارفق عليهم يا ولد لا يطحيون
عبدالله بن دواس - ساجر
يا شايل الأطفال في وسط صندوق
ما تدري إنّكء ظالم هالمساكين
الله ما أسهل قولتك اركبوا فوق
ما دمت ما فكرت درب الخطر وين
عبدالعزيز بن عبدالله البواردي - شقراء
يا سايق الصندوق وين أنت رايح
شكلك غريب ديار ولا أنت مطفوق
بسواقتك هذي وطيت اللوايح
وعرضت ربعك للخطر مانت مسبوق
عبدالكريم النغيمشي - الربيعية
يا مدربين راسك تبي تزهق أرواح
الحوض صمم للغرض والمواشي
ومخالفٍ ما قمت بتجديد اللواح
الحق على التمديد يومه بلاشي
سعود بن عبدالعزيز الهزاع - نعام
المدارس قربت والناس تفرح بالنتايج
والمشاكل ما حسبنا حسابها يالله دخيلك
موتراً شال البزوره بالشوارع صار دايج
لو يطيح الواحد منهم يا بوهم زودعويلك
خالد بن ناصر المخيمر - روضة سدير
لا وين رايح يا ونيت التساهيل
بحمولة الاطفال وسط الميادين
خطراً عليهم تشيلهم مثل البراميل
أتركهم لباصاً أو لصالون تسعين
تميم الوهيبي - القرائن
عشرة وراعين وعليهم زياده في أخطار
حوض الونيت أمتلأ منهم ولا ماء ولا فيء
ومرورنا فالمكاتب وأولياءهم في الدار
والسائق آمن العقوبه ما حسب بعدها شيء
علي بن معاضة - الرياض
نرحب بمشاركاتكم الشعرية حتى مساء الاثنين على الفاكس رقم 4871070أو الإيميل الخاص بصفحة الخزامى:
khozama@alriyadh.com
زاوية (صوت الصورة).. ويا هلا