صوت الصورة

يازين صفة حواشيهم
في حوض هالددسن الكحيان
أختارهن من مواشيهم
قصاب ما يرحم القعدان
عبدالكريم عبدالرحمن السلوم - القرائن
هذي سلوم العرب وأهل المواجيبي
فالواجبة تجتهد وتسوق عانيه
يوم راعي الددسن اللي حايز الطيبي
جاب البعارين يم أفراح الأهليه
سعود بن سعد الحافي - الرياض
حنا على الددسن ركبنا سليمين
وسواقنا ينظر لنا بالمرايه
من فوقنا حبل يشد السنامين
والله علم ويش الخبر بالنهايه؟!
حسين القفيلي - نجران
وين قصر العرس اللي في الصحافه
القعدان أثنين للمعرس هديه
مرسلات من ورى جو اللهابه
يم أبو نواف والنيه مطيه
شجعان بن سعود المقاطي - الرياض
إفتح لي الباب يابواب
افزع نبي شيك ملياني
قصدي هديه وعلمي طاب
وماني من اللي لهم شاني
عبدالكريم النغيمشي - الربيعة
وش بلاهم يوم جونا كتفونا
وركبونا ددسناً وارد عراوي
لو نصيح ونشتكي ما سيبونا
وحنا لنا قلوب.. وكبود.. وكلاوي
زبن مقبل العنزي - بريدة
ددسن قديم وشايلله قعودين
مدري على القصاب ولا هديه
مربطين وحالهم حال مسكين
بعد المفالي وسط نجد العذيه
عبيد سعد القباني
على المقصبة ماشين ويش السويه
وحنا نبي المرباع روح علينا
وعطنى السوالف قبل كتب الوصيه
تعجل ترى القصاب قرر يجينا
محمد بن عبدالعزيز الخنيفر - أشيقير
أنا خابر ونيتك ينقل الشمام
وراك تغير الأسواق والنقله
تيسر جعل دربك ما يصير زحام
عسا حشوك تباع وتنزل الحمله
عقاب بن سقيان العتيبي - الجمش
ياعونة الله عقب ذيك المفالي
سفينة الصحراء بحبال ومقاضيب
من قيمته خلاه راعي الحلالي
واقفوا مع الصندوق يم المقاصيب
سعد الحماد - روضة سدير
ددسن قديم فوقه أثنين حلوين
فوقه قعودين من اغلى المواشي
ياراعي القعدان رايح على وين
كم سعرها بعطيك تاخذه كاشي
سلطان بن حمد الحبابي - الطائف
مادام ددسن شالت أثنين حاشي
معذور يالقصاب لو زدت الأسعار
جلده على عظمه ولا به عراشي
زاد العلف زاد المحل قل الأمطار
فهد بن عقيل الطويان - بريدة
أشوف لي دادسن محمل بعارين
مدري على القصاب وإلا الحراجي
صاحب الددسن موديله ثمانين
لحظة بنقي واحداً وبخراجي
سعد فلاح الصعبي - رماح
يالله يامنزل تبارك والانفال
ويافارج الكربات تفرج لذيه
الحشو وسط الحوض مكتوف بحبال
أطلق صراحه وسط نجد العذيه
ناصر فهد السهلي - الرياض
العواني ما تقاد الا لطلقين الشوارب
وراعي الددسن تكلف وجاب له بكره وحاشي
يبذل النفس الصخية مع صديق ومع أقارب
ويتجمل مع ربوعه حتى لو قل المعاشي
خالد بن ناصر المخيمر - روضة سدير
اطرحوا ذيك الحواشي بالمراح
وفقروها حملوها للمبيع
وجلبوها للمقاصب لذباح
وجلبوها عقب ماهي بالربيع
عبدالله محمد السويح - روضة سدير
أصبر على جور الايام يالحاشي
ما ينفع الندم على ما فات
والعمر تالي الوقت متلاشي
الموت قرب ما بقى له مسافات
سبيتان بن شرار العنزي - بريدة
فوق داتسون عراوي للسوق مجلوبه
أو عند القصاصيب ناوي إنه يعلقها
لاشك ولد الحمايل في نفسه عروبه
للرجاجيل حالف يدسم شواربها
نفل الدوسري - الخرج
الحظ ليعاكس الرجال ياشينه
أباعره جرب والددسن بعد بايد
ومن قام حظه معه جيب لبعارينه
وقت المزاين تجيب له سعر زايد
سعود عبدالعزيز الهزاع - نعام
سعر العلف وباع البعارين
محملاتٍ فوق وارد عراوي
دخله قليل ولا يكفي البزارين
الله يجنبنا كبار البلاوي
عقلا خزن العنزي - تبوك
الله أكبر عقب ما انتن الركايب
بالعراوي حملوكن سفرةٍ ماله عوايد
العجيب صار بالدنيا عجايب
والعجايب ما تعرف بوقتنا غير النقايد
جلعود بن علي الجلعود
عقب ما هي في صحاصح حرةٍ تسعى وتمرح
كبلوها بالحبال وحملوها في ونيت
في طريقه يم سوقه وسعوله أبرح أبرح
شافها الجزار عبده قال مرحب لا شريت
حمد عبدالله الوايلي - حوطة سدير
ياراعي الددسن على وين
السوق تكفى لا تجي له
كل العرب تبغى البعارين
وأن بعتها هذي حصيله
فهد المخلفي - قصر ابن عقيل
ياكثر ما شالوا من البر لسوق
حواشيٍ تجلب على كل جزار
مكاسبٍ يجنون منها هل النوق
وارباح خلت بالقصاصيب تجار
صالح عبدالعزيز السويح - روضة سدير
الدتسن واقف والوجه مابان
شاقني يابندر منظر الصوره
ومحمل قعدان جزلات وسمان
عند باب المسلخ ينتظر دوره
دامغ الدامغ - روضة السدير