صوت الصورة

يا راعي الموتر ترى النفط محظور
بليا دبل وبحور ما هي بسيطه
غلطان ثم غلطان ولا انتاب مجبور
نصيحة حذرا تضيع الخريطه
محمد بن عبدالعزيز الخنيفر - أشيقر
ياللي نويتوا على التطعيس
نسم ولا تحتاج تحفر له
فيه وقت ما يبي تنفيس
لا صارت الأرض مبتلة
عبدالعزيز عبدالرحمن الماجد - ثادق
مالك ومال النفد وارد عراوي
خل النفود لراعي الجيب والشاص
ياللعجب ددسن كثير المساوي
ورط خويه لين حطه على الشاص
ناصر الحافي - الدمام
واعزتا للي مشى دربه غراز
مبعد المطراش ما حوله دليل
غادي اليمه ولا شال الجهاز
غير التوجد بالخلا ماله سبيل
صالح عبدالعزيز السويح - روضة سدير
تكفون فزعة ياهل الشاصات
رمل غزيراً والكفر ملياني
ما هيب سيارة الرحلات
دايم تبي دفن صيجاني
عبدالكريم عبدالرحمن السلوم - القرائن
ماهو يفيد استعدادنا والشطاره
خص ببيدا كلها طعس ورمال
مهما الونيت الرمل فاق اقتداره
واثنين ما يكفي بي عدّة ارجال
سعود عائش الحربي - القاهرة
وش جابكم ياخوان يم الثويرات
وسط الرمال اللي عسى السيل ينصاه
ما ينفع بهالوقت طلعه وكشتات
أبقى بحوشك وأترك البر وانساه
عبدالكريم النغيمشي - الربيعية
توهقوا في البر وسط التغاريز
أحد حفر قدام وأحد دفنها
وش ينبغي بالبر من غير تجهيز
جيبٍ يشق النفد يومه ضمنها
سعد بن سليمان الحماد
قلت موترك هذا ما يسرك في النفود
من عنادك غاص في اللي مثل وصف البودره
اجدع شماغك ويالله ورني فتل العضود
غلطتك والله يعين وخل عنك الدندره
عبدالعزيز بن عبدالله البواردي - شقراء
زود الهواء يا صاحبي صار غربال
نقّص هواها كان تبغي الطلوعي
الوقت حامي والرمل كنّه جبال
والماء قليل وصا بنا زود جوعي
خالد بن ناصر المخيمر - روضة سدير
الددسن اللي غرّز بقمة الطعس
ما ظن تطلع من رمال النفودي
الا يجيك الجيب والا بعد جمس
وتسحب بونش وانت سايق تقودي
فايز فرحان السويلم
يا الجيب شوف الهلكس وشوف راعيها
عزي لمن ساق فيها غال الأِماني
جتنا من الدوله اللي مصنعك فيها
يا ليت ما هي بمثلك صنع ياباني
محمد سماح الغيداني - دخنة
احفر.. ادفن والزمن طال انتظاره
غرّز الموتر وحالي صار حاله
أطلب الإنقاذ وقتك في خسارة
ازهم الجوال.. وابعث لي رساله
حمد عبدالله الوايلي - حوطة سدير
قالوا كشتنا قلت يله مشينا
وراح النهار وما جلسنا على خد
ما بين حفر ودفن تعبت يدينا
أتاري السواق ماهوب يرّد
محمد بن عبدالعزيز التمامي - الرياض
نستقبل مشاركاتكم الشعرية حتى مساء الاثنين على فاكس رقم 4871070أو الايميل الخاص بصفحة الخزامى khozama@alriyadh.com زاوية (صوت الصورة).. ويا هلا..