صوت الصورة

شاقني شوف النفود اللي تشوق
لا وطاها من الحيا وبل السحاب
وموترك يا صاحبي ما هو سبوق
كان ما غرز ولا صابه خراب
بدلّه بموتر دبل حيثه يشوق
يقطع الصمان براحة ما يهاب
خالد بن ناصر المخيمر - روضة سدير
ددسّن خفيفة والنفود متساوي
وغرز بها السواق وأتعب خويه
خفف هواها يا بعيد الحراوي
وازبن على الأنساب والشمس حيه
لبسك يقول إنك على العرس ناوي
حذرا تغيب الشمس ما رحت نيه
فهد بن عقيل الطويان - بريدة
لا تروح بعيد خلك بالمدينة
والعروق طوال وانتم تنحرونه
ولا تحدى النفد تجاوبك المكينه
فعلكم مرفوض وحذرا تتبعونه
الدبل ما هو خفي خابرينه
ذا غرضكم وأفهموا لا تتركونه
محمد بن عبدالعزيز الخنيفر - أشيقر
غرز الموتر في صحراً قفر
لا بها مويه ولا فيها نبات
وضعنا صعب والموقف عسر
نسألك يا رب لطفك والثبات
صاحبي شد حيلك ما ينفع عذر
يمشي الموتر وإلا ودعنا الحياة
من يريد البر توسيعة صدر
يأخذ الحيطة من اخطار الفلاة
ناصر جمعان آل عوض - وادي الدواسر
مسكين ياللي حظهم ما بعد قام
ما جربوا ركب الجيوب المريحات
اللي معه ددسن يسوقه بالاقدام
بلا دبل ينشب بهم فالعريقات
إن طب طعس ما عاد ينلام
ما ينفعه دفه ولو بالعضلات
محمد بن عبدالله المجلي - حوطة بني تميم
ددسن تجاوز عمرها فوق عشرين
موديلها اقفى وراحت سنينه
مبطي لها صوله مع البر والطين
واليوم لا تطلع حدود المدينه
راح النشاط اللي من أيام وسنين
وإذا مشت تسمع حنين المكينة
محمد عفار المطيري - عنيزة
ياقاني الددسن مداك القار
دوبك عن النفد ترقاها
خل الفيافي على الفكسار
وولد السفاري وشرواها
أقولها صدق ما نيب محتار
والخيل ما مود بقناها
عبدالكريم النغيمشي - الربيعية
النفود الكايدة وش جابك ألها
«ددسنك» درب السهل والقار حده
كان جاك الشاص فوق الشاص شلها
ولتشاليح القريبة منك وده
الحقيقة واضحة واليوم قلها
خبط الماطور من كثر المكده
مشاري بن خالد الدعجاني - شقراء
أسألك بالله وش على الدرب حدك
وش حدك توطى موطى الجيوب
كانك تجهل البر أسأل عنه جدك
يعملك عن الأراضي الزينة والدروب
وترى كفرك هو عن المشي ردك
ونصيحتي لك ركب كفرات دنلوب
فهد الفيروز - عنيزة
سايق الددسن هقا به موتره جيب
ما درا أنه راكب ددسن عراوي
دربه كليف وماشي في درب صعيب
وعاونه ما حذره من ذا الهقاوي
يوم غرز شاوره وشفيك يا صحيب
قال حول دفني وش ذا البلاوي
سعود بن سعد الحافي - الرياض
غرز الدتسن في رمل الصحاري
أتعب السواق والراكب يدفه
لا اعترضلك خط دافنته ذواري
نسم التاير وبرح له ولفه
لا نويت تروح في خد براري
اشتر عيار الهوا واللي صفه
شبيب بن حمود القحطاني - المزاحمية
حالتي حالة وأنا أدف البليه
ابتلينا فجيةٍ لأرض النفود
ددسن خمسة ولا فيه الحليه
جايبه ياخي تبي تدبل كبود
يوم تقدم ثم ترجع لك شويه
والهلاك اقرب أظن مابه معود
إبراهيم السويلم - الرياض