صوت الصورة

حمله ثقيل ويمشي في وسط الأسواق
زوداً على هذا ترى الباب مفتوح
خطراً يطيح الحمل فالخط لاضاق
والا يصيب الناس في سوء وجروح
عبدالرحمن بن منصور التركي - البكيرية
ويل منهو فوق كبوته تطيح
والله انه يا صحيب أكبر خطر
ما يفيده لانعدم لوجا يصيح
ولو كتب تقرير من مية سطر
محمد بن فهد الجلعود - سميراء
لوبه عقوبة صارمة كان ما حط
صخرن بحوض الشاحنة دون تربيط
لو فجأة فرمل تساقط على الخط
راح الذي خلفه مثل روحة مقيط
سعود عبدالعزيز الهزاع - نعام
يا راعي القلاب بالحمل غلطان
في وقت ذروة والحمولة خطيرة
سببت رعب.. وخوف.. والكل حيران
واللي مشى خلفك قل لنا وش مصيره
محمد بن عبدالعزيز الخنيفر - أشيقر
أبعد عن الزحمة ترى الخط مزحوم
خل السلامة لك صديقاً مباري
وحافظ على الأرواح وأبعد عن اللوم
الخط مملوء بالحفر والكباري
عقلا خزن العنزي - تبوك
يا سايق المور يا للهول
ترى الحمولة لها ميزان
الحمل زود عليه احمول
يبغى المكاسب وهو عجلان
عبدالكريم عبدالرحمن السلوم - القرائن
احذر من القلاب يا ماشي وراه
ترى الحذر مطلوب في كل الدروب
لا يصيبك من أذاه طيحة حصاه
تودع الكبوت والرفرف معطوب
خالد بن ناصر المخيمر - روضة سدير
يا صاحب القلاب ما كان داعي
تمشي وتحمل كل هذي الحجارة
يمكن تلاقي لك مطب صناعي
ويطيح حملك فوق أية غمارة
صالح علي المرفدي - القطيف
الحمل جاير والمخاطر كثيرة
والشاهد الصورة على كل الأحوال
اخذ الحذر ما دام هذا نذيره
ترى السلامة ما تقدر بالأموال
سلطان منيع الله الشلاحي- الخبر
يا راعي القلاب عز الله أخطيت
وسط المدينة تسوق ما همك أخطار
حافظ على روح البشر ويش سويت
هذي حمولة زايدة شوف الأحجار
بشاير القحطاني - الرياض
نرحب بمشاركاتكم الشعرية على الفاكس رقم 4871070 أو الإيميل الخاص بصفحة الخزامى:
rb-Khozama@alriyadh.com
زاوية: (صوت الصورة).. ويا هلا.