في ما مضى نصف الجماعة لي أعمام واليوم قدني عم نصف الجماعة

بيت الأسبوع الماضي للشاعر عبدالله الشريف والذي يقول:
في مامضى نصف الجماعة لي أعمام
واليوم قدني عم نصف الجماعة
وكانت أصداء البيت من الشعراء:
صبت الهدف والشعر توفيق والهام
من انت ما ادري بس هرجك وقاعه
كان السرا على عزيزين وارحام
ودارت وياربي عليك الشفاعه
عبدالعزيز الصقيري - حايل
دنياك مادامت لوالي وحكام
والعمر يركض بين ساعه وساعه
ماهي على واحد تراها على العام
وكل يبي ياخذ نصيب ومتاعه
ولو عشت عمر شعيب فالموت قدام
ترى الحظيظ اللي قضى العمر طاعه
علي برجس المصقر - الرياض
تمشي بنا الايام عام(ن) ورى عام
وآثر الليالي مسرعه مثل ساعه
اللي بالامس وامس كانوا لنا أعمام
ماتوا وذكر الناس فخر وشجاعه
واللي بالامس وكان عمره بالأيام
اليوم في جيله قوي (ن) ذراعه
صالح بن إبراهيم السنيدي - الحرييق (الوشم)
هاذي ترا الدنيا على طول الاعوام
تاخذ ما تعطي ما وراها طماعه
اللي تعثره يبن الاشراف ما قام
لو كان منزاله براس الرفاعه
لا تلتفت لخلاف ناظر لقدام
والله يعينك عقب فقد الجماعه
الواحد اللي عالمن غيب الايام
الخالق المعبود رب الشفاعه
سعود ثواب المطيري - القصيم
أعمارنا تمضي بها اعوام واعوام
وصرنا كبارِ بين كل الجماعه
راح الشباب وروحت معه الايام
ونحسًب الاوقات ساعه وساعه
والحمد لله دامنا بامن واسلام
وفي ظل دولتنا بسمعِ وطاعه
سليمان بن عبدالعزيز السنيدي - الرياض
الحال ما يبقى على ما هو العام
والعمر يقضي مثل قضي البضاعه
اول صغير يا حليلك بهندام
ترتع وتلعب ما تبالي بطاعه
ولا تفكر لا لفى النوم وتنام
اليوم حل الدور في ظرف ساعه
العمر يمشي وديننا دين الاسلام
الحلم يمضي ثم يطوي شراعه
حمد عبدالله الوايلي - حوطة سدير
بيت الأسبوع
كتب بيت الأسبوع القادم للخزامى الشاعر:
سليمان بن عبدالعزيز السنيدي من الرياض
ويقول:
ترى بياض الثوب ما هوب مقياس
القلب الأبيض هو قياس النظافة
نستقبل صدى البيت المطروح خلال أربعة أيام
من نشر البيت المطروح على إيميل الصفحة:
rb-khozama@alriyadh.com