أبطالنا في كل ثغر يذودون حيوا معي عاشوا حماة البلادي

مع كل نسمة هواء نتنفسها ونحن نرفل بنعمة الأمن والأمان نستشعر دائماً وأبداً المواقف البطولية التي يسطرها أبطالنا الأشاوس في كل ثغر من ثغور هذه البلاد العظيمة تحت عناية الله ثم قيادتنا الرشيدة -حفظهم الله- وحفظ وطننا الحبيب وجنودنا البواسل وبيت الأسبوع لمعد هذه الزاوية عادي بن رمال الشمري ويقول:
أبطالنا في كل ثغر يذودون حيوا معي عاشوا حماة البلادي
وكان صدى البيت من الشعراء:
اللي على حد الوطن يستميتون
عاشت يدينن ما تفك الزنادي
لله در زنودهم يوم يرمون
شجاعة قصوى وعلم ومبادي
لمسيرات وجهوهها يصيدون
قوه ودقه لين تصبح رمادي
أهدافهم يا بورجا يستفزون
بس الجمل ما يستثيره قرادي
عبدالعزيز الصقيري الشمري - حايل
جيش السعودي فاللوازم يسدون
على حدود بلادنا بالزنادي
عن مكه الغرا وطيبه يصدون
شبابة النيران ضد المعادي
بالمدفعية والصواريخ يبدون
على الذي بالشر موذي بلادي
شعب السعودي بالتحية يردون
على جيوش الحد صيف أوبرادي
محمد عبدالله الشهري - مكة المكرمة
في هالبلد حنا بخير وتشوفون
أمن وأمان ورزق من كل زادي
شوفوا حماة الأمن عنا يصدون
كل المخاطر مهتنين برقادي
والحمد لله نشكره خالق الكون
أنه جعل هالأمن عز البلادي
سليمان بن عبدالعزيز السنيدي
أبطالنا صوب السرايا يقودون
حنا سهوم الموت منهو يعادي
في البر والا في البحر هم يسودون
واحدهم بروحه يبيع ويفادي
ميرادهم حوض المنايا ويردون
وخيالة الهيجاءلا صاح المنادي
واللي يعاديهم فلا والله يعودون
عيون الصقور اللي تشوف الهدادي
حمد عبدالله الوايلي - حوطة سدير
حنا جنود الدار والحصن وركون
وإن ثارت الهيجا وثار الطرادي
نزمي على العدوان والعمر مرهون
لاحل يوم مثل يوم التنادي
نفدي تراب الدار وابليس ملعون
حب الوطن تراه شربي وزادي
نطرب ليا شفنا النشاما تناخون
صوت المدافع مثل ريشة عبادي
غالب ظاهر الجنيدي - رفحا
العز يادار بها الخير مقرون
ولله درك يا جنود السدادي
أبطال للعدوان دايم يضدون
مثل الاسود منوخين الاعادي
هم حفظين حدودنا ماينامون
والشعب كله مهتني بالرقادي
وان زادو العدوان بالعزم يزمون
والكل جاهز بالعدد والعتادي
عيد فريح بادي الفاران - حايل
يا موطني حدّك عزيزٍ ومصيون
من خلقة الدنيا ليوم التنادي
نحرسك بإحساس الرجاجيل وعيون
وبكل ما نملك عن أرضك نفادي
معذيٍ طاهر صعيدك ومامون
من حدّ جيزان لحد الحمادي
عيالك الأبطال دونك يذودون
يزلزلون القاع تحت الأعادي
أحفاد من دكّوا طواغيت وحصون
لين افتحوا بالسيف أقصى البلادي
على المدافع بالقذايف يغنّون
وطريحهم ما له نعاش وضمادي
وصقورنا من فوق لا يتَنْغ يرمون
شهبٍ تخلّي كل حيٍ رمادي
درع الخليج اليا اخترق كل قانون
من كل محور شرّ فكره سوادي
نسقيه من كوس الحمم صلو وغبون
ومن ضربنا نكسي سماه الحدادي
بك يامن الخايف ومن يطلب العون
تسود كل العالم ولاتسادي
عوض بن سلامة العنزي - الرياض
جنودنا لحدود بلدنا يحفظون
ماهمهم أرواحهم له تفادي
باعوا النفوس لدينهم لو يموتون
اهدوا بلدهم مهجة(ن) والفوادي
حصن الوطن يوم الوغى ما يهجون
الله يحفظ الدار من كل عادي
صالح بن إبراهيم السنيدي - الحرييق (الوشم)
بيت الأسبوع
بيت للشاعر عبدالله الشريف وهو بيت الأسبوع القادم حيث يقول:
في مامضى نصف الجماعة لي أعمام
واليوم قدني عم نصف الجماعه
نستقبل صدى البيت المطروح خلال أربعة أيام
من نشر البيت المطروح
على إيميل الصفحة:
rb-khozama@alriyadh.com