يا ليت به ساهر على كل مغتاب إلا نطق كلمه تجيه الغرامه

كتب بيت الأسبوع الشاعر سليمان بن عبدالعزيز السنيدي من الرياض والذي يقول:
يا ليت به ساهر على كل مغتاب
إلا نطق كلمه تجيه الغرامه
وهذا صدى البيت من الشعراء:
اللي ما بين الأهل للنار شباب
هذا شناه وذاك شن اتهامه
منشار لأعراض الأجاويد سباب
لين انتشر داه وتحقق مرامه
الله يحطه بالبلا رب الأرباب
يأخذ جزاه ولا يشوف السلامه
عبدالله عايد المفضلي - حايل
يا بن السنيدي يا بعد كل كذاب
قولك صحيح ودونك أعلا علامه
أكالة لحوم البشر دون ما ناب
بالكذب والغيبه وهرج النمامه
ويفتح لأهل القال والقيل الأبواب
يالله يا ربي عليك السلامه
عبدالله عبدالهادي القحطاني - الرياض
ياليت مِن لِاعراض الأجواد شَذَّاب
لِهْ ساهرٍ يحدد غرامة كلامه
ومِنْ غير ذا بِهْ سين مع جيم وحساب
ويالله من ملسك مثل ذا السلامه
سعود عائش الحربي - جدة
الظالم الكذاب للعرض شذاب
دايم موجه بالنميمه سهامه
يغتاب ربعه ويتعرض للانشاب
ويفرق الإخوان ظالم كلامه
جعل الولي يرميه في عجل الأسباب
وترتاح خلق الله وتلقى السلامه
خالد إبراهيم المرشود - الرياض
عند الولي مكتوب مع ذكر الأسباب
امسجل في اللوح وموضح كلامه
وفي ساعة ما ينفعه طب واطباب
لا وقفت الخلق وكل تمنى السلامه
ثم حصلوا قوله مسجل على كتاب
وما يلفضه من قول يعرض أمامه
في حزه ما ينفعه لو تحسف وتاب
ويحسب حسابه كان زود علامه
حمد عبدالله الوايلي - حوطة سدير
اللي سعى بالنم ما بين الاقراب
وفرق ما بين الأبو وابن وعمامه
أخذ كلام وراح وداه ثم جاب
والناس كرهوا بعضهم من كلامه
ودك يفضح به على كل مرقاب
وإن جا المجالس تكتسيه الملامه
رجا عادي بن رمال - الرياض
بيت الأسبوع
كتب بيت الأسبوع الشاعر عبدالله بن عايد المفضلي، من حايل ويقول:
الوسم داخل له ثلاثين ليله
يا رب ترحم يابس الأرض بأمطار
نستقبل صدى البيت المطروح خلال ثلاثة أيام من نشر البيت المطروح على إيميل الصفحة:
rb-khozama@alriyadh.com