فنجال بن رايب للعزيزين هذا جوابي ياكريم المساعي

كان اللغز الماضي للشاعر: محمد بن عبدالرحمن أبو دحيم من البدائع القصيم والذي يقول:
لغزي تشوفه يرتعش بين ثنتين
تستقبله وحدةٍ والأخرى وداعي
يا ما جرى له طور من أول وهالحين
وإن قلت وضّح قلت ما فيه داعي
بسبب عطل فني في استقبال الرسائل الخاصة بالحلول أدى إلى عدم نشر كثير منها نقدم اعتذارنا للشعراء الكرام:
يا مرحبا بك عد نبت البساتين
وإعداد من طافوا طواف الوداع
تعال خذ فنجال سلّم المسلمين
تستقبلك يمنى ويمنى وداعي
مشاري حمد السحيباني - البدائع
لغزن قريته فالخزامى حمر عين
للشاعر المبدع حميد المساعي
هاذا هو الفنجال من دون تخمين
يازين سوقه ياطويل الذراعي
منير مذكر متعب العضياني
دوك الجواب ودوك فك العناوين
يالشاعر اللي في لغوزه متاعي
هذاك فنجال الخوا بابيض الصين
ماجاب حله لي تعب او صداعي
عبدالله عايد المفضلي - القاعد
يابو ادحيم اهلا هلا بك ملايين
الله يسهل لك بزين المساعي
ذي هزة الفنجال يا كامل الزين
لا خلص القهوة وعينه اتراعي
علي الرشيد - رياض الخبراء
اللغز وارد لا معقد وهوزين
تعيش يابودحيم زين المساعي
والحل فنجال بدار الكريمين
متأكد من صحته يالشجاعي
حاتم عبدالله الشاهر - الرياض
حليت لغزك ياعشير الميامين
لغز مجود مثل دفع الرباعي
فنجال بن رايب للعزيزين
هذا جوابي ياكريم المساعي
عبدالله زبن الاسلمي - حفر الباطن
لغز الأسبوع
كتبه الشاعر خالد بن إبراهيم المرشود من الرياض ويقول:
انشدك عن رجل صغير ومحشور
ومكتف العضدين منا ومنا
في مهنة التوصيل يالربع له دور
واحيان يدفع بعض الاخطار عنا
اول وثاني حرف بالجر مذكور
ورابع وخامس حرف طير معنّى
هاتو جواب الغطو ياللي لكم شور
رمعة فهيم ألغاز ماهو بظنا