الحل سراج بالتراث القديمي

«لغز الأسبوع»
كتب لغز الأسبوع الماضي الشاعر سعود بن ثواب سليم المطيري والذي يقول:
انشدك عن رجل حمل داخله بنت
واتذوق في بطنه لهيب الجحيمي
والرجل لولا البنت ما صار له كرت
لو كان موجودن سواة العديمي
رجلن جراله دور في ماضي الوقت
دورن فريد وفي زمانه عظيمي
وقد رمعه الشعراء:
يا مرحبا يا طارح اللغز لا هنت
و الحل سراج بالتراث القديمي
فتيلته في داخله و هذي البنت
لغزك يذكرني بزمان( ن ) قديمي
محمد بن عبد الرحمن - البدائع
ياللي طرحت اللغز اقول لاهنت
لغزك جميل وعارفه يافهيمي
هذا السراج وداخله البنت لاذعنت
في بطن ابوها ساهره يانديمي
كم من بعيد شافها لاتفطنت
يمشي على ضوحه توطى الهشيمي
خليف فهيد الحربي / الرياض
انا اشهد ان اللغز محبوك لامعنت
لغز المطيري حابكه من الصميمي
حله االسراج وفتيلته لاطفطنت
في بطن ابوها تدهر من جحيمي
عبد الله الفهيد - الرياض
على جمال اللغز يا سعود لا هِنْت
احييت بِه وقتٍ جميلٍ قديمي
الحل سراج والفتيله هي البنت
يوضي سنا نوره لضيفٍ حشيمي
وبمشاركة صفوه مِن اخوه ونا ونت
نخدم تراث اسلافنا اللي سليمي
سعود عائش الحربي - جدة
يا مرحبا يسعود كملت واحسنت
في لغزك الطيب تمام وسليمي
فتيلة إسراج هي الحل لا هنت
موجود في عصر مضى من قديمي
علي الرشيد - رياض الخبراء
يامرحبابك عدماجيت اورحت
ياسعودلغزك مثل رجل كريمي
وافي المعاني ولاقريته تنبهت
حله فتيله تشتعل من قديمي
داخل سراج فيه نوره ولاهنت
وهذا جوابه خذ جوابي سليمي
/ حمد عبدالله الوايلي - حوطة سدير
"لغز الأسبوع "
كتبه للصفحة الشاعر أحمد بن ناصر المحرج من الرياض والذي يقول:
ابنشد اللي فاهم ودايم فطين
اللي يصيد الغازي لوهن خافيات
ياويش بنت ببطن بنت من سنين
وثنتينهن في وسط عود ساكنات
يازينها ذا البنت عند الناظرين
ياما هووها في سنين ماضيات
باسبابها ماتو رجال صامدين
صاروا مع الايام ضمن الذكريات
نستقبل الرمعات والحلول خلال أربعة أيام
من نشر اللغز على الإيميل:
rb-khozama@alriyadh.com