الحل هو عينين من دون تخمين الله يجنبهن ردا واعوجاجي

كتب لغز الأسبوع الماضي الشاعر سعد صنهات السهلي من الدرعية والذي يقول:
انشدك عن ثنتين فى موقع زين
ما هن حلو وأحيان ما هن هماجي
ما هن نظيف ولا بعد ناشه الطين
هو يختلف مع اختلاف المزاجي
يا شاعرن لغزك يهيض المغنين
عدلت قافه مادخله انعواجي
اللغز حله يابيض الوجه عينين
والدمع ماهن يا طليق الحجاجي
منير بن مذكر متعب العضياني
الحل واضح مايبي من براهين
لغزٍ بداه القرم طلق الحجاجي
أعني سعد صنهات لغزك هو العين
بهن نشوف الصحو والا العجاجي
عبدالكريم إبراهيم ابن خزيم - البكيرية
تنشدني عن ثنتين بالموقع الزين
وانا بقول عيون والماء هماجي
يا مرحبا وحنا لحجاويك شفقين
واحفظ عيونك لا يحوشك عجاجي
محمد بن عبدالرحمن أبو دحيم - البدائع
لَك التحية يا سعد مِع عزيزين
أساس بالصفحه لِكل ابْتِهاجِي
الحل في راس أعْطف الناس عينين
أو عين طفل حين جرح وعلاجي
سعود عائش الحربي - جدة
ياللي كتبت اللغز أهلا ملايين
لغزك على الصفحة علامة وتاجي
الحل هو عينين من دون تخمين
الله يجنبهن ردا واعوجاجي
على الرشيد - رياض الخبراء
أنا شهد أن اللغز محبوك حبكين
ما هن مخلوق وداخل العين لاجي
هاذي العيون ويغذيه ماهن الزين
وعند الحزن يصير ماهن هماجي
خليف فهيد الحربي - الرياض
لغزك يابن صنهات يسوى الملايين
لو ينجلب ويحط تحت الحراجي
من جملة الغالين ما هو الرخيصين
هاذا كلام الصدق والصدق ناجي
وأعطيك حله كاش ما هو ببعدين
هن العيون اللي بهن ابتهاجي
سعود بن ثواب سليم المطيري
أقول أنا البنتين للكل غالين
لكل البشر فيها الهنا واحتياجي
عيوننا هي نورنا يالمحبين
فيها الهنا وفيها السعد وانفراجي
محمد بن عبد العزيز الخنيفر - أشيقر
يا بري حالي لادمع داعج العين
وسبة زعل والابسبة عجاجي
وعينين في وجهك وبالعد ثنتين
هذا جواب اللغز وسجل مزاجي
حمد عبدالله الوايلي - حوطة سدير
«لغز الأسبوع»
كتب لغز هذا الأسبوع للشاعر سعود بن ثواب سليم المطيري ويقول:
انشدك عن رجل حمل داخله بنت
واتذوق في بطنه لهيب الجحيمي
والرجل لولا البنت ما صار له كرت
لو كان موجودن سواة العديمي
رجلن جراله دور في ماضي الوقت
دورن فريد وفي زمانه عظيمي
نستقبل الرمعات والحلول خلال أربعة أيام
من نشر اللغز على الإيميل:
rb-khozama@alriyadh.com