اللغز

الأسبوع الماضي كان اللغز من طرح الشاعر/محمد عبدالكريم الشايع من بريده
والذي يقول:ياويش بنت زوجوها لرجال
واللي جمعهم شب نار الزواجي
رجالها للحمل صابر وشيال
والبنت للرجال مثل العلاجي
وقد توصل للحل شعراً كل من :
إليا نويت الدرب حذراك الإهمال
تفقد الموتر بوسط الكراجي
يمكن يبنشر ما مشى عشرة أميال
والحل رقعة للساتك علاجي
محمد بن عبدالرحمن أبو دحيم -البدائع
أهلاً و سهلاً فيك ياطيب الفال
من لغزك المنشور زاد ابتهاجي
اللستك اللي ترقعه بارخص المال
عبه هوى لاصرت له باحتياجي
أحمد حواس الشمري -الرياض
هات القلم نبي نسجل لنا أمثال
يوم حل اللغز دار بمزاجي
رقعة بلاستك وأكتبه مثل ما قال
وفك الكفر وره لراعي الكراجي
دخيل الشمري - حفر الباطن
مشكور يا الشايع على بدع الأمثال
اللغز معجبني ووافق مزاجي
البنت بعد (زوجت) حالها حال
رقعة كفر ياما أنشده من زواجي
زبن مقبل العنزي -بريدة
يامحمد الشايع لك الخالدي قال
في لغزكم لاهنت زاد ابتهاجي
باللستك الرقعه بلا شك واجدال
من عامله يركب رخيص الحراجي
فهد بن عقيل الطويان- بريدة
ياللي طرحت اللغز ياطيب الفال
جاكم جواب اللغز صاغه مزاجي
البنت رقعه نارها تشعل شعال
والرجل لستك عندنا بالكراجي
صالح بن عبدالله الكاسب -عنيزة
يامرحبا ترحيبة تشرح البال
والحل يوجد عند راعي الكراجي
الرقعه الحمرى والحل ما مال
دخانها عطبه سواة العجاجي
صلاح بن عبدالله اليابس - رحيمه
الحل وصلك يابن شايع وبالحال
من خاطراً ماصار فيه انعواجي
رقعه ولستك مابها شك وجدال
خذها من اللي طاف فكره وداجي
علي بن عمر الخراشي -عنيزة
أهلاً هلا بك عد آلاف الأميال
واعداد ما ينبت بكل الفجاجي
واللغز حلوه النشاما والابطال
رقعة ولستك ممتلي بالعجاجي
علي رشيد الرشيد -رياض الخبراء
يامرحبا حييت ياطيب الفال
اللغز واضح ماغطاه العجاجي
الحل رقعه تنفع بحال وبحال
ومتنفع المرقعه وسيع الفجاجي
سالم بن صبيب البشري -الجبيل
كما توصل للحل نثراً كل من:
ناصر الهديرس/الرياض، دخيل الحسيني/ الرياض، صالح عبدالله الزايد/بديرة، أحمد عبدالله الحميضي/بريده، انفال خالد الغزاي، جهز عامر الجليدي/ النمريه.
لغر الأسبوع
كتبه الشاعر/ عبدالله صالح الاطرش من الرس ويقول:
ياويش أبواب تجي عكس مالوف
متخالفه من دون قفل ومزلاج
وليا انقفل باب دخل شي معروف
وليا انفتح باب منع كل هراج
نستقبل الحلول على فاكس/4871070
خزامى الصحارى -زاوية لغز الاسبوع كما نرحب بطرح الألغاز الجيده والجديده