اللغز

الاسبوع الماضي كان لغز الاسبوع من طرح الشاعر خالد بن علي الجناحي والذي يقول:
انشدك عن ورع حياته غرابيل
يمشي وبالممشى تجدد علومه
نحيف ولو يقعد من الصبح لليل
نمنا وهو سهران ما جاه نومه
وقد توصل للحل شعراً كل من:
يامرحبا بك عد ما تجري الخيل
واعداد ما جاب البشر من علومه
لغزك ترى حله شريط التحاليل
يمشي على الشاشة وهذي اسلومه
علي رشيد الرشيد - رياض الخبراء
يامرحبا في راعي البن والهيل
في صفحة خزامى قرينا علومه
لغزك شريط أخبار ما يركب الخيل
واللي جهل بالحل ماحد يلومه
محمد بن عبدالرحمن ابودحيم - البدائع
ارسلت حلي في جزيل التماثيل
فابيات شعر كلبوها امحكومه
هذا الشريط اللي يجيب التفاصيل
في شاشة التلفاز بانت رسومه
مسفر محمد العتيبي - الرياض
الحل واضح ما يبيله تفاصيل
مثل السماء بالليل تظهر نجومه
شريط بالشاشة بها القال والقيل
ياكثر ما يمشي باليلة ويومه
ياسر بن محمد الدفاع - عنيزة
يامرحبا حييت بالحيل بالحيل
لغزك ترا يحتاج قعده وقومه
هذا شريط أخبار والعلم تفصيل
ياللي تبون الحل جتكم علومه
علي بن عمر الخراشي
يامرحبا ترحيبت البن والهيل
باللغز واللي جاب لغز القرومه
هذا شريط اللي يجيب التفاصيل
دايم يحدد للمشاهد علومه
عبدالعزيز عبدالله الشوشان
اللغز واضح يالسنافي وحلحيل
واضح ولا يحتاج نبحث رسومه
شريط بالتلفاز بالصبح والليل
يعطيني الأخبار وأقرا علومه
موضي بنت علي الخراشي
لغز الجناحي واضحن دون تحيل
في شاشة التلفاز بانت رسومه
جسمه نحيل وبينن كنه سهيل
شريط نشره وأن غلط ما نلومه
فايز بن حماد الشمري - حائل
ولم يتوصل للحل نثراً سوى طلال فالح الحربي - رياض الخبراء، فالح غازي الحربي، رياض الخبراء.
لغز الاسبوع
كتبه علي رشيد الرشيد من رياض الخبراء ويقول:
رجل يسير في مجاله ويرجع
لكن حاله في مسيره عجيبه
يجبر صفوف في مجيه تجمع
وإذا رجع فرق وهي مستجيبه
نستقبل الحلول على فاكس 4871070 خزامى الصحارى زاوية اللغز كما نرحب بطرح الألغاز الجيدة والجديدة.