يا طفل ياللي بْسَاقِي المَاي أبحر... من واقعك حققت بعض أمنياتك

هذا المدي اللي على البال شفناه
لاجل الحلال اللي يسرك بشوفه
لاواهني اللي يبي الخير يملأه
ياما من اجرن للنفوس العطوفه
الله يجيب الخير وللدار ملفاه
لبهيمةٍ بالصيف للماء شغوفه
ونلقى الصحاري دايم السيل يملاه
ونفرح بمرباع العرب له لهوفه
محمد عبدالعزيز الخنيفر - أشيقر
إنْ عَاسَرَتْكِ ظْروف وقتك تصبر
واصنع لكِ ظْروفٍ تِسايِر حياتك
ما دام مالك حيل باللي مقَدّر
كَيِّف أمورك تَكْسَبِ السَّعْد ذاتك
لا تندب اللي راح تندم وتخسر
يمكن يكون الشر في شيِّ فاتك
يا طفل ياللي بْسَاقِي المَاي أبحر
من واقعك حققت بعض أمنياتك
ناصر جمعان آل عوض - وادي الدواسر
غواص ماهر هبلت بالضان
يومك تسللت في ماها
مقرود شكلك وفيك اجنان
وشلون تسبح بمقراها؟
يا رب يظهر عليك فلان
ويدوس راسك بمفلاها
عبد الكريم النغيمشي
يروى حلالي عقب ما شبع يا سعود
ويحيا من الماء مثل كل الخلايق
والحر ماله حل بالقيض يا كود
عدة سباحه شكلها حيل لايق
لو أختلف مكانها وشاشة النود
بغطس وأغوص وهالمدي موب عايق
ما دامني مبسوط والحال في زود
طعم الوناسه داخل القلب ذايق
نايف حمود النافع - الزلفي
على المدي وردن عليه البهايم
حد العصر يردن عليه الظوامي
متخالطٍ فيها الشكل والنعايم
راعي حلالٍ بين شاري ونامي
واللي تبرّد داخل الحوض عايم
اظن حر القيض شاعل وحامي
والخير يا أهل الخير اجره ودايم
فضله كبير وتم قولي سلامي
حمد عبدالله الوايلي - حوطة سدير
مشرب عذب يسبح بمجراه الأطفال
الظاهر انه راعيٍ للحلالي
ومرعى خصيب منبته مصدر خيال
مزنٍ تقاطر صافي من الجبالي
ويطفي عطش سيله شياه مع رخال
وعشبٍ طبيعي ومويه من زلالي
سعود عبدالعزيز الهزاع - نعام
الحوض وردت عليه الضان
من شدّة القيض عطشانه
ما يارد الما سوى الضميان
لا جات تمشي وتعبانه
يالله يامجري الوديان
من خير ربي وامزانه
عبدالكريم عبدالرحمن السلوم - القراين
هذا المدي يا طفل للطلي والشاه
ما هو مخصص يا طفل للسباحه
الماء ركيك ومغبرٍ ما فيه راحه
تراه ضيّق والمرض في ثناياه
ولّم اللستك واغنم زود المساحه
خلك بو سط المسبح اللي تمناه
وأنوار تكشف دايمٍ باستراحه
أزرق سماوي ما ودك انك تعداه
خالد ناصر المخيمر - روضة سدير
المدي مليان بالخير الوفير
جعل دار الدين يا ربي تسيل
البهايم وارده بعد الشعير
تطلب الما يا عسى ماهو قليل
يالله بمرباع يا ربي كثير
وتبتدي العربان يمه بالرحيل
والعرب لاربعت تبدأ المسير
تبني البيوت با لجو العليل
ريان محمد الخنيفر
هذا الشبل بالفعل ماهر.. وسبّاح
بين الغنم يسبح بوسط البراري
وضيّق مكان الشرب غاطس ومرتاح
مرتاح من كثر العنى والطواري
سعد ناصر المسفر
يا طفل تكفى لا تعيد السباحه
خلك بعيدٍ عن مشاريب الأغنام
دوّر مكان الغوص وأيضا السياحه
وأصبر على مرّ الزمن طول الأيام
بشائر القحطاني - الرياض
نرحب بمشاركاتكم الشعرية وما تلتقطه عدساتكم من الصور الهادفة والطريفة على إيميل الخزامى:
rb-khozama@alriyadh.com
ويا هلا..
صورة العدد السابق