صوت الصورة

الأرنب اللي صادها الطاير عصير
لا والله اللي جاب لأمه عشاها
من شدّة المخلاب ما فكّه الطير
يا قشرها .. يا قردها وين جاها
طير السما يرزق على الأرض ويطير
يا عقاب خل الأرض للي وطاها
شجعان سعود المقاطي - الرياض
يا طير ما حدّك على الصيد يا طير
إلا لهيب الجوع لا صرت جوعان
يا حظ من مثلك تنفل عن الغير
يأكل بمخلابه ولا يرجي إنسان
يا رب تفرج لي وتكتب لي الخير
رزقٍ حلال ودوم يا رب بأمان
عبدالكريم النغيمشي - لوذه
الطير في كبد السما شايلٍ صيد
صيدٍ ثميٍن قاضبه بالمخالب
أفرد جناحه ثم هدأ وهو بعيد
ناصٍ يبي وكره وللصيد جالب
الحرّ لطيور السما صايرٍ سيد
يشبع بنفسه حرّ ماله مطالب
عثمان إبراهيم الرشيد - الرياض
الطير ولعة وعالي شان
يا زين منظره فالفيضه
عند الهدد بندق بنيشان
سبحان مخرجه من بيضه
شال الطريدة بلا ميزان
واستل جناحه من الهيضه
عبدالعزيز فهد الريس - الرياض
الحرّ حرٍّ يعجبك لا نوى الصيد
ما يترك الصيده وقت انطلاقه
يضرب مشاويرٍ قريبة أو بعيد
ودايم مع الصقّار بأحسن علاقه
دايم على الصيدات يضرب بتهديد
ما يرحم الصيده وقت الحماقه
محمد عبدالعزيز الخنيفر - أشيقر
الطير الاشقر فارد جنحانه
نسرٍ تعلّى صايد فريسه
كلّب مخاليبه وزاد اشجانه
والأرنب اللي حالته تعيسه
يبي كلاه ومبعد احزانه
راح بدقيقه حالته فطيسه
حمد عبدالله الوايلي - حوطة سدير
أهل الصقاره بالخلا تعيش بدوان
لهم نوادر في حرار .. وشياهين
علّق وغطى صيدته بسبق جنحان
حملٍ ولا يقدر على شيله اثنين
سعود عبدالعزيز الهزاع - نعام
الحر ينوّع الهجمات
وفي صيدته ما يخليها
معروف دايم على الطلعات
في كل وقتٍ يسويها
صيد الحباري وله عادات
الصيد عادة وهاويها
ريان محمد الخنيفر - الرياض
النسر شنكر مخاليبه
بالصيده اللي شلعها فوق
لازم عشة عياله ايجيبه
والله عسى يرزق المخلوق
يالله عسى القنص ما يصيبه
ويجنّبه كل مطفوق
عبدالكريم عبدالرحمن السلّوم - القرائن
خلك على ما ضيك يا طير حوران
جول الحباري بالسما تلتهم له
الأرنبه يا طير هي صيد ضبيان
صيد السلوقي فوق حدبا قذله
الرفعه مقام النفس لو كان ما كان
خذ الصبر من صبر عنتر وعبله
بدر الحزيمي
النسر شال الأرنب وطار بسماه
ما شالها إلا لجل سدَّت جوعته
في يوم صيده يكتفي منها عشاه
سبح ولا ضيع حقوق بجشعته
احمد السمحان - الزلفي
صورة العدد السابق
نرحب بمشاركاتكم الشعرية وما تلتقطه
عدساتكم من الصور الهادفة والطريفة ..
على إيميل الخزامى:
rb-khozama@alriyadh.com
أو الفاكس رقم: 0114871070