اشوف بعض الناس تحت النوافير في أي موقع باردٍ ما تخليه

يالله تنجينا من الحرّ يالله
حرٍ تزايد في اللهايب سمومه
أحدٍ يسافر مع خليله وخلّه
يبي البراد اللي يزيّن حلومه
داله وسالي جوه اليوم فلّه
وأحدٍ يكابد في زمانه همومه
حدّه إلى منّه تظلل بظلّه
يخفي جوابه مايبيّن علومه
حمد عبدالله الوايلي - حوطة سدير
اشوف بعض الناس تحت النوافير
في أي موقع باردٍ ما تخليه
واشوف سلومن سالكينه ترى غير
فعل خطاممنوع يامن مشى فيه
هذي نصيحه والفعل دون تفكير
ترى المسابح وافره كان تبغيه
وهذي جمال بلادنا وافهم السير
واللي يعرف الدرب الله يحييه
محمد عبدالعزيز الخنيفر - أشيقر
الحرّ باقي له شهر أو شهرين
والناس قفّت للديار البعيده
تبي البراد ولو تسوق الملايين
وأطفالها بشوف النوافر سعيده
تلعب وتلهى تكحل المرح بالعين
والوقت طوّل والإجازة مديده
ويلي على اللي مدوامٍ خاطره شين
بين الورق وأخبار نشر الجريده
خالد ناصر المخيمر - روضة سدير
الحرّ خلاهم قريب النوافير
على ملابسهم بها الحال راضين
الكل منهم يقترب للمواسير
حتى يصب الماء بقوّة وتمكين
كلٍ حسب حاله ولا به مخاسير
ما يلحقه لومٍ .. ولا يحتمل دين
علي الرشيد - رياض الخبراء
خذوا دش مياه من النوافير من الحر
يبرّد عليهم من لواهيب ذا القيض
قياس الحراره فوق خمسين واكثر
شمسٍ لك الله حرّها يسلق البيض
يا رب لطفك فالحشر باليوم الاقشر
حرارةٍ منها اللهب غيض من فيض
سعود عبدالعزيز الهزاع - نعام
صوره صداها قال وين الشتا وين
وين البراد وين وقت الأزاهير
القيض من شدّته مطلوب أمرين
ظلٍ ظليلٍ مع مياه النوافير
جملة نوافيرٍ لها الناس هالحين
ينصون من حرٍ وفسحة مشاوير
سعود عائش الحربي - جدة
الجو حار وشدّة الحرّ تحتاج
لجواً يسر القلب فيه البروده
واليوم شفنا الناس أفواج وأفواج
يبي السفر وشفناه يبذل جهوده
يدوّر المرواح ويشوف منهاج
لجواً يسر القلب ينفذ وعوده
على المناطق ما خفى اليوم دوّاج
معه عياله كلهم مع جدوده
ريان محمد الخنيفر
الناس تسبح وسط هذي الناوافير
تجمعوا سيّاح من كل ديره
الحرّ ما يرحم بوقت الظواهير
يالله عسى بالأمر يا ناس خيره
بشائر القحطاني - الرياض
نرحب بمشاركاتكم الشعرية وما تلتقطه عدساتكم من الصور الهادفة والطريفة على إيميل الخزامى:
rb-khozama@alriyadh.com
ويا هلا..
صورة العدد