صوت الصورة

الغنم في وسط البايكة محشوره
يالله عسى ماهي سايبه أو ضايعه
والراعي إلى عجز يقوم بدوره
مادرى عنها هي شبعانه أو جايعه
وينك ياراعيها تشوف الصوره
ومال تودعه ليتك بايعه
خالد بن ناصر المخيمر - روضة سدير
شفت البهايم واقفات بهن خوف
في داخل البايكه من اللي حداهن
أربع شياه وتيس معهن وخروف
يثغن بعالي الصوت يبغن عشاهن
يستنون الراعي ولاشافهن شوف
ويمكن يضيعهن بعد مالاقاهن
خالد غنام الغنام- رياض الخبراء
شوفوا البهايم بالظلال وسعيدة
تبي البراد وتتقي بالمظلة
حيث الحراره ياجماعه شديدة
وترى محل الغير ماهو محله
حلالكم شوفوه والله يزيده
هذي نصيحه يالجبر تكفى قله
محمد بن عبد العزيز الخنيفر- أشيقر
حلال يدوج في الكراجات ماله وال
هله هملوه ومخطر مالشلاليح
عسى الله يبدل حالته ذي الى أحسن حال
ويفتك الديجة وبعض المراويحي
وعسى الله يعوضه بالحيا ماطر همال
حقوق على الخليان وأهل الفلاليحي
مبارك محمد بن طرجم الدوسري- وادي الدواسر
نظرت ووقفت بالصورة
وشاهدت انا الجاي والرائح
أشوف انا الضأن محشورة
بالصندقه حظها طائح
دائم عن الرعي مقهورة
والحربأجسامها فائح
زبن مقبل العنزي- بريدة
لفلوس مقصرة والغنم تبغى شعير
قرب الموتر نبي السوق بدري قربة
قربة قبل مرض يصبح اعلاجه عسير
ونتندم كيف فات الوقت لم نكسبة
بيعها احسن من الاقتنا يابوعبير
الزمن مر يغلبنا ومرة نغلبة
سلطان بن حمد الحبابي- الطائف
خل البهم تسرح وتمرح بفلاه
والبايكه خله للكسز وللجيب
وسط المفالي تسرح العنز والشاه
وصك عليها بالمنازل تره عيب
محلا البهم لاعودت عند مسراه
هذا يقوله ناصر محمد الشيب
ناصر بن محمد الشيب- حائل
شفت الغنم واهمت مبناك
من غير تحذير بالقوة
ياموتري تفتح الشباك
بالشمس غصب مع مروه
طبع الكرم ثابت بسجاك
مجبول ماجاك من توه