من لا ظهر صيته بطيب وهو حي ما ظاهر له صيت عقب المماتي

بيت وصدى

كان بيت الأسبوع المطروح قد أرسله للصفحة الأخ حجي عايد المفضلي من الرياض للشاعر منصور بن رمال والذي يقول:
من لا ظهر صيته بطيب وهو حي
ماظاهر له صيت عقب المماتي
ويأمل مجاراته من الشعراء عبر هذه الزاوية
ووصل للقسم 22 صدى وننشر ماجاز منها للنشر حسب معنى البيت المطروح:
الطيب تبنى خيامه البيض ياخي
على الكرم والجود علم ثباتي
وهبة من المعبود والدايم الحي
ربي الهي واطلبه في صلاتي
اسمه يكفينا بلا الحاسد العي
له الثناء والحمد آخر وصاتي
صالح محمد محارب البشري - الرياض
رحماك يامولاي ألطف أبكل حي
أسالك حسن الذكر وستر الحياتي
بيض الأيادي للوفاء حسهم حي
أهل الجمايل حافظين الصلاتي
يا بانينً طيبه مثل حاتم الطي
أحذر من الحساد واهل الوشاتي
خالد عبدالله حمد الصفيان - الرياض
بعض البشر للناس مُورِف كما الفي
مدات جوده مثل نهرٍ فراتي
لو قلِّ ماله بسمته كنها الضَّي
ما شان وجهه لو بجوعه يباتي
يصفح عن المخطي ولا يحقدِ بْشَي
صدره وسيعٍ، فيه حِلْم وْ أناتي
ناصر جمعان آل عوض - وادي الدواسر
من لا حظى بالطيب في عيشته ذي
يبطي عظم يمدح بزين كلماتي
ليمات ينسى دام نهجه ولاشي
ينسى عقب قبره ونصب الحصاتي
بس الحظيظ اللي علومه كما هي
طيبٍ ومعروف وعذب كلماتي
سعود عبدالعزيز الهزاع - نعام
من لا اشتهر بالطيب ياصاح ياخي
مايشتهر بالطيب عقب الوفاتي
ومن لايحوشه في حياته قفَا في
تلحق عليه الشمس من حيث ياتي
اللي شهر بالطيب حاتم ولد طي
واللي سواته من رجال ٍ دهاتي
مشعل بن صنت العصيمي - الخرج
من لا يحوز الطيب مادام هو حي
تصبح علومه كلها فايتاتي
خطو الولد يعجبك لاقام ياخى
قام وتزهل يفعل المعجزاتي
ما كل وراد يارد على المى
يوم الامور الاوله شاهداتي
خليف فهيد الحربي - الرياض
اغنم زمانك دامك اتروح وتجي
واحرص على المعروف باربع جهاتي
وابعد عن اللي يوصلك مسلك الغي
جنب عن المشبوه شين الصفاتي
هذي وصاتي وافهم العلم يا خي
والموت لو طال العمر كود ياتي
علي الرشيد - رياض الخبراء
اللي بحياته مابنى له ولا شي
لايعدي المرقاب والعمر فاتي
الزرع يمحل لاقطعته عن المي
مثل البشر تضمى بشين الصفاتي
لوطالت ايامك ترى حاتم الطي
صيته من افعاله بطول الحياتي
جمال صالح الحنيني - القصيم
ترى السبيعي قال جاء مامعه شي
ورزقة على اللي ينشي الممطراتي
وقال الكرم قد فاز بة حاتم الطي
ترى الحياه ايام ثمن مماتي
وانا اطلب لله لسماء ورفع ايدي
يالله سامحني على مخطياتي
سعد صنهات السهلي - الدرعية
الطيب اللي ماعرفو فعله السيء
ويستر عيوب الناس لو هي ثباتي
وقت العطا كفه كما حاتم الطي
يسقي نبات الارض عقب المماتي
لاتامن الدنيا ولاتطمع بشيء
ولا تدور ارزاقك بها لاتحاتي
يزيد عبدالعزيز البجيدي - الرياض
دنياك ماتسوا كما شربة المي
لاشافه العطشان بل الشفاتي
ياطالب للصيت أصمل ولّو عي
تري طراة العمر قبل المماتي
ومن لاظهر صيته وهو توه صبي
مايسعفه طول العمر بالحياتي
عبدالله عبدالعزيز القديري - العطار
اللي ذكر بالخير ماضاع له شي
واللي مقصر مكسبه سيئاتي
هذي رساله وافهم العلم ياخي
حافظ على دينك قبل الوفاتي
ولاتطاوع اللي ماشي اليوم بالغي
نقول له مسكين بئس الصفاتي
محمد بن عبد العزيز الخنيفر - أشيقر
بيت الأسبوع
أرسل للصفحة الدكتور علي العفنان بيتا للشاعر زيد الخوير رحمه الله والذي يقول:
إلى اجتمع عز مع الكيف كافي
ماني على الدنيا كثير التحاسيف
ويأمل أن يكون له صدى من الشعراء عبر هذه الزاوية
نستقبل صدى هذا البيت بثلاثة أبيات فقط خلال ثلاثة أيام من يوم النشر
ويكون الإرسال عبر الإيميل:
rb-khozama@alriyadh.com