بيت وصدى

الأسبوع الماضي كان بيت الأسبوع من طرح الشاعر فهد عبدالرزاق الرمال من الأحساء حول موضوع ضرورة معاملة الخدم معاملة إنسانية حسب ما يمليه علينا ديننا واتقاء لشرورهم من جهة أخرى والبيت يقول:
الخدم صارت مشاكلهم كثيره
يا ترى وشهو سببها ياغناتي
وكان صدى البيت من الشعراء:
الخدم من كل فج وكل ديره
تختلف بالجنسيات وباللغاتي
ما نبي نكشف مضامين السريرة
من يستقدمهم يشوف المعجزاتي
يا فهد كلن تراء عينة بصيرة
لو ايلبس ثوب وتلبس عباتي
الاسود هندي العنزي/الرياض
ضعف دين أو شعوذة غربه أو غيره
والأعمال بكل وقت أو متعباتي
لازعل خادمك جهز له خفيره
وسط بيتك حول مالك لا يباتي
لاتنازل عنه لا يمسي ابديره
حقه اعطه مع تكيت الطايراتي
فهد بن عقيل الطويان، بريدة
السبب مافي ملفه حسن سيرة
مع سلوك من بلاده قبل ياتي
تثبت نفوس الخدم ماهي شريرة
تامن الاسره على اولاد وبناتي
وارحم العمال ونسوان فقيرة
لا تجي دعواتهم لك مرسلاتي
سعود بن عبدالعزيز الهزاع - نعام
التعامل للخدم في كل ديره
جاير والناس مافيهم ثباتي
يمنعون حقوقهم هذي خطيره
منع راتب مع ظروف سيئاتي
يا جماعه مانبي سب ومعيره
العداله الزموا هذي وصاتي
علي رشيد الرشيد - رياض الخبراء
للعمل تاتي ولاهي بالجديرة
وتحمل امراض علينا مخطراتي
الوطن مليان باعداد كبيرة
واهلها لاجل المكاسب ساعياتي
مهملة باجرامها في كل ديرة
وبالشوارع سايعة كيف السواتي
محمد عبدالعزيز الخنيفر - اشيقر
ان شكيت الحال يا سيدي عسيره
اسمعوني افهمو كامل وصاتي
الخدم صارت مصايبهم مريره
والجرايم عندهم زرع ونواتي
هيه يلي تامن الحيه خطيره
نابها يفرز سموم مزعجاتي
والامانه كايده ياهل البصيره
احفظوها دامها اكبر غلاتي
حمد عبدالله الوايلي - حوطة سدير
السبايب من حراكات المديره
عيفت بعض الخدم كل الحياتي
كل واحد لازم يحكم ضميره
ولله اللي عالمن بالخافياتي
سعد صنهات السهلي - الدرعية
البعض وكل لهم صف السريره
والعيون اللي قرت تعرف وصاتي
كل كافل خادم ذو حسن سيره
يبشر بعين على عياله تباتي
وكان ناوي شر واعلومه عسيره
الله يعينه على اللي مقبلات
عاتق العاتق
يا فهد موضوعنا مافيه حيره
ما يبي غير النقاط اللي بتاتي
الخدم وحقوقهم تبقى كبيره
مابها منه ولا تبغي وصاتي
لا تحاقر لك بشر فايات ديره
وعامل بلطف ولباقه يامناتي
محمد عبدالله المري - تروي، الولايات المتحدة الأمريكية
بيت الأسبوع
من طرح الشاعر محمد عبدالكريم العمير من الرياض حول موضوع التجمهر حول الحوادث المرورية وحب الفضول عند كثير من الناس والبيت يقول:
تجمهروا حول الحوادث كثيرين
فضول والاسعاف سدو طريقه
نستقبل صدى هذا البيت بثلاثة ابيات فقط تدور حول موضوع التجمهر حول الحوادث المرورية اوالحرائق ومايسببه ذلك من اعاقة للسير وتأخر سيارة الاسعاف او الدفاع المدني وواجب المواطنين تجاه ذلك والارسال
ويفضل الارسال عبر الإيميل rb-khozama@alriyadh.comاوعلى الفاكس (01/4871070)
مقترح لموضوع بيت الأسبوع القادم
أرسل للصفحة الأخ عبدالعزيز الحصان من الرياض مقترحاً لبيت الأسبوع القادم وهو ضرورة نشر الوعي بين المواطنين حول التعامل مع كل المواد الخطرة والتعرف عليها عن طريق الاعلام المرئي بالدرجة الأولى والاعلام المقروء.