صوت الصورة

خمسة صقور اليوم وقت الهدادي
المربط اللي فيه حرٍّ وشيهان
فك السبوق الوقت حل البرادي
خلّه يصيد الصيد يكفخ بجنحان
رحلة قنص وسط الجلد والحمادي
جملة رجالٍ بين ربعٍ.. وخلان
عبدالمحسن محمد المحيسن - رياض الخبراء
نبت البراري بان ومرادفه جو
طبيعةٍ مسبوقةٍ زخ الامطار
جلسة صحاري مكررٍ بارضها نو
ريحة نباته ريحة غراش الاعطار
لي جيت عند النفد واشعلتوا الضو
وعلى طوارفها دلالٍ بها بهار
تعدّل مزاج اللي من صداع يشكو
وتسلي اللي من الهوى صابه اخطار
سعود عبدالعزيز الهزاع - نعام
جمعة نشامى مع سواليف وأخبار
في مجلسٍ رجالٍ بجال النفودي
قدامهم صفرٍ على واهج النّار
نفوسهم حلوه وحبٍّ يزودي
وخمسة حرارٍ جاهزه فوق الاوكار
تعجبك عند صدورها والورودي
علي رشيد الرشيد - رياض الخبراء
طيوركم صادت وقمتم تغدون
وهي تناظركم تبي قطعة لحيم
يا ناس غدوها قبل تنظف صحون
من حقها تأكل.. ولا تعمل رجيم
وان كان لزمتوا ترى الحق مرهون
لطيوركم يا إخوان من دون تلزيم
جيبوا لهم هرفي مكحل ومزيون
مطبوخ ومقلقل ومشوي على السيم
عبدالكريم النغيمشي - لوذة
الخير لا من حل تفرح به الناس
تكشت وتطلع من هموم المدينه
خمسة نشاما بين قناص وعساس
في وسط خايع كنهم زراعينه
معهم طيورٍ شوفها يجلي البأس
صقور الحرار اللي تجيب السمينه
ويلي عليهم همهم كيفة الرأس
ما فكروا بوقت الدوام و سنينه
خالد ناصر المخيمر - روضة سدير
الجو زان وطلعة البر زينه
يا زينها مع الرفاقة والأخيار
لا واهني الصقر بأرضٍ حسينه
يا حلوها يا ناس مع شبّة النّار
لا جا الربيع الزين خل المدينه
في روضةٍ تعجبك بورود وأزهار
وما أحلى الربيع اللي شبيه الجنينه
ياما بها خيرات مع كثر الأمطار
محمد عبدالعزيز الخنيفر - أشيقر
أهل القنص فلوا على الخير والزاد
وصفوا طيورٍ مشفيه تبغي الصيد
ياهل القنص مافيه صيدٍ ولاعاد
ترجون طيرٍ واقعٍ له على حيد
راح الزمان اللي به الصيد ينقاد
وقتٍ تولّى ما تجيه المقاريد
حلاة هالجلسه إلى حفها اسعاد
جال النفود وكل وقتٍ بتحديد
حمد عبدالله الوايلي - حوطة سدير
قرب الربيع وموعد القنص بصقور
وشوفا لخلا مع طيب الأوقات فلّه
الكل للمقناص راغب ومسرور
وتجمعوا على الذي يسّر الله
والأرض هي والوقت والطير له دور
ومقناصهم للصيد ساسه وكلّه
سعود عائش الحربي - جدة
السمّره اللي عقب مقناص
مع شبّة النّار والدّله
أخوي أبو سالم القنّاص
ياليت من هو خويٍ له
وأبو حرص واقفٍ بالشاص
والعفش قد حمّله كلّه
أطيور حرّه بدون أقفاص
بشوفهن تبري العلّه
عبدالكريم عبدالرحمن السلّوم - القرائن
نرحب بمشاركاتكم الشعرية وما تلتقطه عدساتكم من الصور الهادفة والطريفة على إيميل الخزامى:
rb-khozama@alriyadh.com
أو الفاكس رقم: 0114871070
صورة العدد السابق