صوت الصورة

الصيد قرّب وأنا ولهان
للصيد يا ناس شوفوني
صيّاد ماهر وأنا لي شان
أصيد لو رفت جفوني
نبي ندكه على النقيان
ندوّر الخرب والجوني
آكل ووزع على الاخوان
وأبيع ما زاد بصفوني
عبدالكريم النغيمشي - لوذة
جهّز العدة وشد الجمس ناوي
موتر شده على حد الغماره
ناوي المقناص في نفسه شفاوي
والخوي اللي يسلي في حواره
ذكرياتٍ ماضيه يوم الهقاوي
يوم ولد الاش ما يقطع مساره
زانت الرحله وذيب البر عاوي
عاويٍ ذيبه على ضبي الزباره
حمد عبدالله الوايلي - حوطة سدير
الوسم جانا وابشروا يالقوانيص
الكل ولّم عزبته مع زهابه
أختر رفيقٍ عارف الدرب وبخيص
مع السهل.. والا بعالي هضابه
سلطان أحمد العضيدان- الغاط
صوره قديمه لذكرياتٍ جميله
بعز العمر حطوا لهم رسم تذكار
معهم شفر أزرق وظني موديله
خمسه وسبعينٍ مصنّع للأسفار
محملينه من الحمول الثقيله
ومطارةٍ تطفي عطش كل من سار
سعود عبدالعزيز الهزاع - نعام
اللون كحلي والكفرات بالون
والشكل يأخذك لزمان الطرابه
جمسٍ جميحي ما نسيناه تكفون
ياما عزفنا له لحون الربابه
مركب بدو للحمل لاجوا يشدون
العفش فوقه ما يحسّب حسابه
تسمع وحيفه بالوطا تقل مجنون
صوت المكينة مثل صوت الذيابه
خالد ناصر المخيمر - روضة سدير
رحلة قنص والطير فوق الغماره
يبي الحباري تنفج اليوم يقفاه
والجمس الأزرق واقفٍ بنتظاره
بالحوض ..عزبه والتوانك مملاه
صوره قديمه بين سايق .. وجاره
جنب الونيت اللي تمايل حناياه
دقة سوالف بين الأثنين شاره
ياما حلا الصمان هذي حلاياه
عبدالمحسن بن محمد المحيسن - رياض الخبراء
جهّز الموتر ترى الرحلة طويله
نقصد المرباع ولا نبغى المدينه
يا هني من هو تجهّز في رحيله
يم ديار السيل خصٍ يم لينه
للشمال مسافرٍ لأرضٍ جميله
وسط جواً يسر وفي عشبه يزينه
مع الرجال السالفه حول المليله
السوالف تعجبك دايم حسينه
محمد عبدالعزيز الخنيفر - أشيقر
ياما حلا الطير مرتاحٍ على السلّه
والماء بمطاره ما فيها الكيماوي
البر منهو مشوا به يبيري العلّه
ما غير صوت الطيور وجرّة الشاوي
يا زين هاك الزمان أحن له كلّه
مع شروق الشمس ونورها الضاوي
لطيفه بنت محمد العبدالرحمن
اللي مضى من كل الأزمان لازم
يحتاج وقفاتٍ للأفكار .. وإنصاف
لا صرت للمطراش يالقرم عازم
أختر خويك .. أختر الوقت والهاف
وأجمع على فوقه لزوم اللوازم
راعيه من عسر المطاريش ما خاف
سعود عائش الحربي - جدة
يا عمر تل الجمس .. يا عمر تلّه
أركب وتل الجمس مع هجعة الناس
ليا نامت البومه سرى الليل كلّه
يبعد مصابيحك عن الربع الأنجاس
أترك ردي الرأي يقعد محلّه
دوّر بداله من قويين الإحساس
بدر الحزيمي
ابتدا المشوار يم الشمال
باتجاه السيل بأرضٍ به ربيع
حمّل الموتر وخذ معك الحلال
طلعةٍ مع ربوعي بجواً بديع
كم يزين الجو لا شفت الخيال
برحلةٍ فيها المحبّة للجميع
والسوالف والشِّعر علمٍ عدال
نسمعه من هل الذوق الرفيع
ريان محمد الخنيفر
الله مع اللي نوى المقناص
والجمس والم تشوفونه
الكل يبهج لراع الشِّاص
خوي طيّب تعروفنه
أبو حرص صايد وقناص
النشمي اللي تخبرونه
أمعشي الطير حبَّه خاص
رجل الكرم لا تلومونه
عبدالكريم عبدالرحمن السلّوم - القرائن
نرحب بمشاركاتكم الشعرية وما تلتقطه عدساتكم من الصور الهادفة والطريفة على إيميل الخزامى:
rb-khozama@alriyadh.com
أو الفاكس رقم: 0114871070
ويا هلا..
صورة العدد