صوت الصورة

ياما حلا المكشات مع نقوة أصحاب
أصحاب ما ملّ الخوي من خويه
البر له جلسة ومعه الفكر طاب
بين الرجال علوم تسّمعْ سويه
والهاف ماينّشد ولو واجه صعاب
يمشي على الصحراء عزومه قويه
عثمان إبراهيم الرشيد - الرياض
حي شوف الجمس وطلوع البراري
مع نشاماً كلبوهم طيبين
كل منهم عاشقٍ للبر ضاري
من زهمته قال حنّا حاضرين
جلسةٍ فالبر ما هي في الحواري
كأنها الأعياد في ماضي السنين
كل مشحونٍ طرى له بعض طاري
يقنبه والله عوين المستحين
مبارك محمد الدوسري – الرياض
أبعد عن الضوضا وكب التناكيد
وأبسط فراشك في طرف هالمدينه
برفقة نشاماً كلبوهم صناديد
خويهم ما جته يوم الغبينه
على دلال مبهراتٍ بغاديد
تجلي العمس عنك بوقته وحينه
عبده أحمد الشمري - الخرج
واهني اللي يسوق البهبهاني
الخوي اللي يفرّج عن خويه
وإن تريّح ارتفع بأعلى المكاني
فوق طعس الرمل يا نسج الخليه
نزّل العزبه .. ورحّب باللساني
أشهد إن الحر في طبعه حليه
أحمد السمحان - الزلفي
يا ما حلاة البر ومعك الرفاقه
مع النشاما طيبين السلومي
سوالفٍ فيها حسين العلاقه
الكل مع ربعه يدير العلومي
بيعة بليّا زعل أو حماقه
وهذا هو المطلوب جعله يدومي
ريان محمد الخنيفر - الرياض
مكشاتكم يا ربعنا قبل الأمطار
بأرضٍ محل والرمل من فوق يسفاه
جمسٍ قديمٍ كانه اثنين عبار
ضاري على البران والطعس يرقاه
حل بمكانه جيب واليوم تذكار
متشكلٍ بالنوع يابان مجناه
عبدالمحسن محمد المحيسن - رياض الخبراء
الجلسه اللي على وقت الغروب
مع النشاما الأربعه خبره وذوق
في جرهدٍ ما طبته كود الهبوب
على ونيتٍ صاحبه ماهر يسوق
هذا يريح النفس لو فيها شبوب
الجو جوك صافي وانت شفوق
حمد عبدالله الوايلي - حوطة سدير
كشتة عصر الأربعة جو على الجمس
لاقرب شعيبٍ عن مباني المدينه
ترفيه ساعاتٍ إلى تختفي الشمس
سوالف وشعر النبط حافظينه
الجو بارد ما خذوا ما بترمس
شرابهم من دبةٍ جايبينه
سعود عبدالعزيز الهزاع - نعام
ياهل الونيت الجمس ارتاحوا اشوي
إلا وتصب الدلّه اللي تسوا
الجمس الأبيض ناوين له على شي
مفتح الجامات حتى تهوا
وأن طار عنكم العماس مع ميلة الفي
امسك طريق الصح وخل الملوا
شجعان سعود المقاطي - الرياض
ياما حلا الجسله على جال غرمول
نفود يفتح نفس منهو يشوفه
معك خويٍ راعي الطيب مجبول
شبّة غضى فنجال بطلعه محفوفه
تنسى همومك لو الفكر فيك مشغول
تعيش لحضة عمر والدنيا مخلوفه
خالد ناصر المخيمير - روضة سدير
يا زين سعة الصّدر زيناه
لا صرت مع ربعٍ يودّونك
والجمس واقف على يمناه
كود النشاما يشوفونك
والبن الأشقر شربناه
ما باقي إلا على صحونك
عبدالكريم عبدالرحمن السلّوم - القرائن
يا هل الونيت اللي قديمٍ موديله
يا حلو جلسات السمر والتعاليل
جلسة شرف ما هيب نقد وفشيله
سوالفٍ ذربه ومزح وتماثيل
في منكبٍ توّه ندي عقب سيله
سمر وشواء وفلة حجاج ومعاميل
ناصر موسى الحزاب - حريملاء
ما تزين السوالف ما يزين القصيد
غير مع ربعك اللي بالوفا طيبين
مع رجال النشاما تهرج اللي يفيد
والقهاوي مع أهل الطيب والخيّرين
وجلسةٍ تعجبك مع هل الرأي السديد
عادةٍ دايمة وجعلكم سالمين
محمد عبدالعزيز الخنيفر - أشيقر
عن المدن ربعٍ سعوا للبراري
وخويهم جمسٍ تحطه على اليمنى
هواً نظيف ولا زعيج البواري
هذي حياة أجدانا حلوة المعنى
كن البراري لك ونيسٍ إمباري
في صحصحٍ لا صرت ما نته بمبنى
سعود عائش الحربي - القاهرة
الجمس يزيد الوناسه وزين التعاليل
وإلا قيل يا الجمس سقها قال سقها
ياما حلا مكشاته مع قرومٍ مشاكيل
خوّة رجالٍ على وضح النقا عمدها
فيها دلال البن الاشقر وتمر وهيل
والأرزاق والأنعام ربي اللي خلقها
عبدالله سليمان الشمري - الرياض
يا وجد حالي وجد من شبّ ضوّه
وأحبَك مكانه.. ما هو إنسان حوّيق
بأرضٍ خلا أقراب وأصحاب خوّه
كلٍ على ولفه يهاويه شوّيق
يعجبك شوف العشب.. والبَر لوّه
قفر الفلا .. ما له مع البَدو سوّيق
يا ما حلا المجلاس لا صار جوّه
شعرْ.. وسواليفٍ من إنسان ذوّيق
بندر الخنيفر
صورة العدد
نرحب بمشاركاتكم الشعرية وما تلتقطه
عدساتكم من الصور الهادفة والطريفة ..
على إيميل الخزامى:
rb-khozama@alriyadh.com
أو الفاكس رقم: 0114871070