صوت الصورة

الصوره اللي شفتها بالخزامى
صوره خطيره والضحايا بها أطفال
ياما من التحذير ياما.. وياما
مير البلا ما حداً يحطه على البال
زبن مقبل العنزي - بريدة
تبي توسع صدور الأطفال واخطيت
ركبتهم في حوض وارد عراوي
تقول أجلس يا ولد وحين دقيت
سلف القرمبع طامروا للحداوي
سعود بن عبدالعزيز الهزاع - نعام
يا ناقل الأطفال في حوض ددسنك
فعلك خطا واهمال في كل الاحوال
التربيه من حقهم ترتجى منك
حتى ولدك ان طاح ما طاب لك فال
فهد بن عقيل الطويان - بريدة
يا خوف بعض اللعب يرجع ندامه
وش ذنب هالأطفال في وسط صندوق
يا زينه التوقيف وتاخذ غرامه
حتى يصير اللعب بعدين برفوق
عبدالله بن عاتق الغرابي - رياض الخبراء
الحوض صمم.. والهدف نقل الاغراض
ومن عادت الورعان كثر الطواري
لو تامن الطيحه ولفحات الامراض
منظرك يابن الناس ماهو حضاري
سعد الحماد - روضة سدير
و الله إنك غادي .. و ما بك وريّه
حاملٍ هالورد في راس الشدادي
ماخذٍ هالمسأله عن حسن نيّه
احفظ الأطفال يارب العبادي
لطيفة محمد العبدالرحمن - الرياض
ياللي تسوق الخطر ما غاب
تراهم يمكن يطحوني
بالمشي ارفق على الركاب
قدمت انا النصح و اعفوني
محمد صالح الأطرش - رياض الخبراء
تمسكوا يا أهل القلوب النظيفه
يا جعلكم قرة نظر والديكم
وياسايق الموتر بمشيه خفيفه
يا جعل حفظ الله ستارٍ عليكم
سعد عبد الله المقابله - الخرج
يا راعي الموتر ترفق على الهون
تراه ددسن والمسافه طويله
وبالك على الجهال حذرا يطيحون
النفس ما فيها عوض أو بديله
حمد عبدالله الوايلي - حوطة سدير
اطفالكم يا ناس حذرا يطيحون
لا تنقلب افراحكم بالمصيبه
بإرادة الله دربكم غير مضمون
وين الفكر هذي سلومٍ غريبه
محمد بن عبدالعزيز الخنيفر - أشيقر
تمسكوا مكانكم يا وراعين
قدامنا طلعه نبي نسرع شوي
ومستقبل الايام نشري غمارتين
الله يزينها والازمه تعدي
عبدالله أبو زوير العتيبي - الرياض
صوره تذكرني زمانٍ لنا فات
يوم تتطامر بوسط حوض العراوي
نصفق ونرقص ونتغنى بالأبيات
عاش السواق اللي على البر ناوي
خالد بن ناصر المخيمر - روضة سدير
يا راعي الددسن الكحيان
حاسب على اللي ابصندوقك
يا ليت تشري لهم نيسان
الكل منهم يطلب ويدعيلك
عبدالكريم عبدالرحمن السلوم - القرائن
يا راعي الددسن مدري على وين
مسافر ورايح في خلا خالي
اربعة عشر ركابٍ وراعين
طلاب الروضة وصلهم للاهالي
فايز عبدالله العسراني - الرياض
بحوض الونيت اطفال بلحيل مخطور
هذا على فعله ترى اليوم غلطان
ما هو على هالفعل يا ناس معذور
وترى السعاده بعدها ياتي احزان
ريان محمد الخنيفر - الرياض
صورة العدد الماضي
نستقبل مشاركاتكم الشعرية على الفاكس (4871070)
أو الايميل الخاص صفحة الخزامى
RB-khozama@alriyadh.com
زاوية (صوت الصورة) ونرحب بالصور الهادفة والطريفة..
ويا هلا.