محاورة

محمد الربيقي
مجرات السماء ما أحدٍ خبيرٍ في كواكبها
والارض مكورة والناس تسعى في مناكبها
و لكن الحقيقة ماتغيب عند واجبها
يقولون العرب من لاقدم للصيد ماصاد
يالله أنك توفقنا الطريق الصحيح
لين تبلغ هل الهقوات مقصودها
كان شفنا راع الشعبي تكلم فصيح
تطلع الشمس و الجمرة على عودها
فلاح القرقاح
مجرات الفضاء في حكم خالقها و محصيها
لكن اكبارها تعرف دوايرها و اساميها
و حكم الله يرفعها و حكم الله يوطيها
يقولون العرب من لاقدم للصيد ماصاد
المسيرة تقدم و العلم مايطيح
جات بيض الليالي و امسحت سودها
لاتحذفون غير الجني اللي يصيح
يزعج المسلمين و يدبل كبودها
محمد الربيقي
وش آخر ماتوصله على الساحة رجال المال
ترى لاهانت القيمة و رخصة ضاعت الاعمال
يا ابن ريفة ترى لك صوت مايجهل و لك مدخال
يقولون العرب من لاقدم للصيد ماصاد
ماطلبنا معونه من يدين الشحيح
ليت بعض العرب ماتنقض إعهودها
الصراحة طلب و أن كنت مرة صريح
وقعت بين شعلتها و بارودها
فلاح القرقاح
يجون الناس و يروحون لايمكن يضيق الدرب
و لافيها هزيعة طال عمرك لقحطان و حرب
تقول العلم حط و شيل اقول العلم جدول ضرب
يقولون العرب من لاقدم للصيد ماصاد
من سلوم العرب مايذبحون الجريح
لاتحارش ذياب الارض و فهودها
الصحيب السنافي و الرفيق المديح
الله يجنب القرقاح منقودها
محمد الربيقي
لو أنك ما أنت حاضر قلت للقرقاح وصلها
يامندوب البريد رسالتي و أن جاته ازهلها
لكن الليلة علومك تشكل وش يشكلها
يقولون العرب من لاقدم للصيد ماصاد
لانشدناك يالقرقاح خلك صريح
حبة الخشم مدري ويش مردودها
لايسولف بها اللي في فراشه طريح
كان تقدر زيادة ملحها زودها
فلاح القرقاح
أنا رجال عاقل و ادري أن فالوقت برد و حر
و بعد ماعشت فاعل خير كيف أصير زارع شر
ياليتك تعتبرها مع صحيبك رحلةٍ في بر
يقولون العرب من لاقدم للصيد ماصاد
من قدر يفلج الاخصام لايستريح
يزبن المحكمة و يطق فشهودها
الجبل مايكبر و البحر مايبيح
و لو تقولون عدها يمكن أعودها
محمد الربيقي
بعد ماقلت لحظه تأصل القاضي و يقضيها
وقف من دونها ياحضرة السامع بناخيها
أنا ما أبري القرقاح و أصحابه ما أبريها
يقولون العرب من لاقدم للصيد ماصاد
اختلط مع نبات الارض عرعر وشيح
و البدو بالصحاري جفت أعدودها
بين دين الحنيفية و دين المسيح
كلمةٍ كودها ماتنكشف كودها
فلاح القرقاح
اقول أن اكثر البدوان للي جاه مستاجب
و لابد العسكري بالعسكرية يكمل الواجب
هدفنا مشترك و العين ماتعلى على الحاجب
يقولون العرب من لاقدم للصيد ماصاد
البناخي قلط و الزند يقدح قديح
بيض الله وجيه اللي حمت ذودها