يا الله عسى في جنة الخلد ملفاك
يا طيب السيرة حميد السلومي
يا الشامخ اللي جزل الأخلاق مبداك
يا النادر الشهم الكريم العزومي
تنعاك نجد ومن سكن نجد ينعاك
وينعونك أيتام وشيخان قومي
وينعاك من لا ضاق صدره تنصاك
حطك أمل بعد الولي له تقومي
شد الرحال ومن قسى الوقت ناداك
عليه صايرة لياليه شومي
يبشر بعزه لا تشرف بلقياك
وينعم بظلك عن لهيب السمومي
يا فاتح قلبك وصدرك لمن جاك
جاه ووجاه لمن قصدك بلزومي
ما حد يا بو خالد يسوي سواياك
من خلقتك والباب مفتوح دومي
للضيف يضحك يا بو خالد محياك
في مجلس عامر بجلستك يومي
عطاك ربي جزل الاخلاق واهداك
ومسحت عن وجه اليتيم الهمومي
ياما بذلت في سكة الخير يمناك
ولكل علما زين نفسك ترومي
تنفق يمينك ما درت عنه يسراك
ترجي جزاها من منشئ الغيومي
يا الله عسى فعل فعلته بدنياك
تلقاه بالميزان يوم القسومي
ندعيلك الرحمة عسى الخلد مثواك
يا الله عساك بظل رب رحومي
وحنا عزانا يا سعد عقب فرقاك
يبقى أملنا بالعيال القرومي
في خالد وبندر وسلطان حلياك
ومحمد محمد قوي العزومي
اربع حرار بالوصايف حلاياك
من مدرستكم ناهلين العلومي
يارب يا مدير الهبايب والافلاك
عسى لياليهم بعزك تدومي