الجو زان وراح وقت السمومي

سلام ياللي لازهمته جزومي
ياللي لعين البل نازل و رحال
مثلك خوي الطيب شيخ القرومي
اللي تنومس خوته كل رجال
قم يا نديمي ياقوي العزومي
قم ياعلي لاهنت ياطيّب الفال
الجو زان وراح وقت السمومي
وجانا المزن متبوع مع كل همّال
مع سجة اقدامي تجلّى همومي
القى يابو ماجد بها راحة البال
في موقعٍ ماجا بنقل العلومي
والله على اللي ما يجي فيه الارسال
اما على روس النوايف نحومي
ولا بخبه بين شبه وفنجال
واكّحل اعيوني بشوف الغيومي
وبشوفة بكارٍ لها القلب ميّال
وضحٍ ماهي للي يجينا يسومي
من حبها فدوه لها المال والحال
نبعد عن الديرة وبعض الرخومي
وعن من نظنه للصعيبات حلّال
اللي بفعله مايسد اللزومي
ونبعد عن اللي يعشق القيل والقال
وعن من على الخوه وفاها معدومي
من هرجها ياصاحبي عكس الافعال
ما ودي اخص الردي بالهجومي
حشمت نفسي عن مجارات الانذال
الطيب وهّبْه والردي مهزومي
لو كان له ف بنوكنا روس الاموال
نعز من طبعه يحب الخشومي
اللي ماحب الكف لو الزمن مال
عزيز نفس ولايبيع السلومي
مقدام دايم للثقيلات شيّال
ويالادمي مافيه حالٍ يدومي
دنياك من حالٍ تقلب الى حال
‫عبدالله بن داوود العصيمي