مشاعر مواطن ... ( قصيدة )

هذه مشاعر تجاه سلطان الوفا وسلطان الخير الذي مّن الله عليه بالصحة والعافية واعاده الينا سالماً ومعافى
مشاعر تعتبر جزء بسيط من باب الوفاء تجاه امير الخير والانسانية ابو خالد امد الله بعمره :
يابوي تنشدني وهذي علومي
مبسوط دام انه تعافى كحيلان
سلطان ابو خالد سليل القرومي
حر شهر بالطيب في راس مابان
حر على الطولات دايم عزومي
والمجد يبصم له على طول الازمان
انه ببحر العز دايم يعومي
ومن خلقته دايم على المجد شفقان
وعلى علو المجد حط الوسومي
وسوم الفعول اللي تميز بببرهان
زهت له البيضا وصارت لزومي
لراع الوفا والطيب كساب الاحسان
عد الروا اللي بالمراجل يزومي
من يارده يصبح بهالوقت ربحان
هذا الذي شوفه يزيل الهمومي
واسمه فخر للقاف في كل الاحيان
تاج الوفا نبع الصخا والسلومي
ذرب اليمن اللي له المجد عنوان
اللي يمينه مثل وبل الغيومي
ياماجلت عن صدر من ضاق الاحزان
كم واحد جا له يعض البهومي
من كبر همه ثاير فيه بركان
يسهر وعينه ماتهنى بنومي
ويصبح عليه الصبح و القلب وجلان
تفتحت دنيا العنا بالثلومي
ونادى على سلطان سلطان سلطان
انا دخيلك عن لهيب السمومي
تكفى يابو خالد ترى الحال تعبان
الوقت خلاني اشوف النجومي
بعز الظهر واللي فرض خمس الاركان
وانت الامير اللي بشعبه رحومي
مضرب مثل ياللي فلا غيرك انسان
وجاه الفرج من يد ذرب العلومي
وبنى كيانه سيدي عالي الشان
وطير الفرح من فوق راسه يحومي
وحظه نهض والوقت في خاطره زان
وختامها لعل عمره يدومي
اقولها من قلب وشعور ولسان
واللي يبي عزه يفز ويقومي
يكسب نواميس الفخر مثل سلطان
الشاعر بدر العياضي . بريده