ترى القلم يمشي على كيف ارادتك

كان لغز الأسبوع الماضي للشاعر سعود ثواب سليم المطيري والذي يقول:
انشدك عن رجال يمشي برغبتك
يمشي على رغبتك وقت اللزومي
نفعه بعبراته ايلاجات حاجتك
وابكم واصم ومنك ياخذ علومي
وقد كانت الحلول كالتالي:
لغزك جزل ياسعود والجزل عادتك
مبدع يابن ثواب جعلك تدومي
بعطيك حله صح وأشكر قريحتك
ترى القلم حله ولابه وهومي
منير بن مذكر متعب العضياني
ياسعود هذي رمعتي شوفها جتك
ياطير شلوى ياقوي العزومي
ترى القلم يمشي على كيف ارادتك
والعالم الله يابعيد العلومي
أحمد بن ناصر المحرج - الرياض
هاذي حريتنا وهاذي جريدتك
فيها طيور بالخضيرا تحومي
صح الله لسانك بلغزك وحبكتك
ولا هي غريبه من رجال قرومي
هذا القلم لا جيت تكتب قصيدتك
مشه على بيض الورق ومخدومي
حميد محسن الصاعدي
تحية ياسعود تاصل لحضرتك
وازكى سلام للحشام القرومي
حله قلم حبر تحطه بحفنتك
يلزمك للتوقيع دايم مدومي
علي الرشيد - رياض الخيراء
يا سعود انا أفداك لي رمعةٍ جَتْك
في حل لغزك جعل عمرك اِيدومي
هذا القلم يمشي على حسب شوفتك
ياما كتب تاريخ ربعٍ اِقْرومي
سعود عائش الحربي - جدة
ياسعود لغزك حدد اليوم حالتك
لغز رقى في راس عيطاء يزومي
فيه المعاني جزلة من جزالتك
واللغز أجيبه بإذن رب رحومي
هذا القلم حله يجي في رسالتك
والنور يسطع في مجال الغيومي
حمد عبدالله الوايلي - حوطة سدير
هذا القلم يا سعود يمشي برغبتك
يمشي على رغبتك وقت اللزومي
نبعه بعبراته إليا جت حاجتك
وابكم اصم ومنك ياخذ علومي
محمد بن عبدالرحمن ابودحيم - البدائع
لغز الأسبوع
كتب لغز الأسبوع الشاعر خالد المرشود من الرياض ويقول:
ياويش بنت على رجال
متحمله مثل رجاله
تفتر من شدة الاهوال
والا الرجل ثابت جاله
بنت مع الحل والترحال
يازين صوته وشلاله
نستقبل الرمعات والحلول خلال أربعة أيام من نشر اللغز على الإيميل:
rb-khozama@alriyadh.com