نبيها على الدين

حرية المرأة نبيها على الدين
حذرا لشرع الغرب تمشي خطاها
الغرب شرعه وارثه من شياطين
وحنا بشرع الله نحقق مناها
والدين بيّن حقها خير تبيين
والدين هو ستر المرة هو غطاها
هذي ترى المرأة من سنين ودنين
مرتاحة ولا اشتكت من عناها
يالغرب وش تبغى بهن يالمسيكين
دون المره حنّا وحنّا ذراها
حنّا بشرع الله على الدوم ماشين
لو كثر هرجك والحكي في قفاها
ما لك علينا درب عنكم غنيين
لنا غناة الله عساه يحماها
ولنا مشايخ بالشريعة ملمّين
بالشرع هم يفتون ونآخذ فتاها
في دولة آل سعود نسل العريبين
الحق كامل تاخذه وبرضاها
في عزّ أبو متعب سليل السلاطين
به دين ودروب الصحابه مشاها
ماشي على السنة ودرب المصلين
والقبلة الأولى حشا ما نساها
همّه معاناة العرب والمسلمين
همّه يداوي جرحها مع غثاها
يالله أنا طالبك يا رب ثنتين
تحفظ حبيب الشعب حامي حماها
وان المرة تبقى على الشرع والدين
وبشرع ربي ماشيات خطاها
عبد العزيز إبراهيم الهويمل /حريملاء