بانت حقايق حقدهم

بديت بسم اللي به الناس بادين
سبحان خلاق الملأ بيده الخير
الواحد اللي له عباده مطيعين
مجري هبوب الذاريات المعاصير
مولاي غيره ما لنا عون ومعين
به نستجير ولا لنا غيره مجير
بسمه بديت القاف من عقب تفطين
هاضت روابع خاطي بالتفاكير
جاني خبر ما هو هقاوي وتخمين
علمٍ سمعته يغضب البال وايثير
الصحف اللي ترسم ختام النبيين
تناولوا خير البشر بالتصاوير
بالمصطفى يهزون ماهم مبالين
قالوا كلام وكل ما قيل تزوير
تطاولوا على الرسول الخبيثين
ولا عاد للمسلم حشيمه وتقدير
عدوان وأغواهم رجيم الشياطين
يالله عساهم باللظى والزمهرير
بانت بوادر خبثهم بالبراهين
وأكبر دليل اقوالهم بالتعابير
ومن قبلهم جند الخباث الملاعين
داسوا كلام الله بخف البصاطير
كتابنا المنزل تعفّر من الطين
وأسبابها منا تهاون وتقصير
فعل الملاحد زاد غيض الملايين
وفجر غضب كل الأمم والجماهير
الكفر اللي في حق الإسلام مخطين
عدوان شرع الله شباه الخنازير
الحاقدين اللي عن الحق مغضين
قاموا بفعل يكدر البال تكدير
يا المسلمين استيقظوا واحموا الدين
عن العبث والمهزله والمحاقير
اصحوا تراكم بالأعادي محاطين
وخوذوا إحاطة في جميع التدابير
مطلوب صد المجرمين المعادين
ما يردع الباغي رسايل وتحرير
ما نلتجي لمرافعات المحامين
ولا نكتفي في واهيات المعاذير
الهرج ما يشفي صدور المغلين
والخوف ما فك الحمام المخامير
شدوا على العدوان ما ينفع اللين
اللي استباحوا دينكم دون تبرير
تكاتفوا واستافوا الصاع صاعين
تاريخكم سطر على المجد تسطير
وجدودكم شجعان ما هم ذليلين
نالوا فخرهم بالسيوف البواتير
أحفاد فرسان الوغى بالميادين
صفوة صناديد الرجال المشاهير
وأنتم بعون الله ونصره قويين
ما راعكم لو يصدر الخصم تحذير
صونوا حماكم يا سطام الحريبين
عن الطغاه أهل الخزا والمناكير
اللي يبون يغيرون القوانين
جابوا نظام الغرب للشرق تصدير
للمنهج اللي يخالف الشرع عاصين
عاصين ما نقبل عن الشرع تغيير
اللي هجموا لديار الإسلام غازين
بالطايرات وبأمهات الجنازير
باجوا بلاد وفجرو به براكين
هدوا قصور وسموا الهدم تعمير
حطوا من العزّل أهداف ونياشين
للمسلمين اليوم صاروا جزازير
هدوا مساجد فوق روس المصلين
ولا عاد في محرابها صوت تكبير
وسط السجون يعذبون المساجين
بعضودهم وضلوعهم صار تكسير
جابوا صورهم بالمحطات عارين
والكل شاف المهزلة والمصاخير
حاطوا عليهم شبك مثل الحياوين
وصنادق تشبه أقفاص العصافير
عدوا من الأموات لو كان حيين
في سجنهم لاقوا مهونه وتعزير
واللي جلوا عن دار الأجداد لاجين
يشكون من جهد البلا والمخاسير
عدوان دين الحق ماهم خفيين
مقصودهم واضح ولا يريد تفسير
من أجل توطين اليهود بفلسطين
الغاصب اللي دمر الشعب تدمير
المسلمين اليا ذبح منهم ألفين
كنه ذبح فرخ الدجاجه من الطير
ولا اليهود اليا جرح منهم اثنين
الغرب ندد بالعجل دون تأخير
أن اعتدوا عن جرمهم غمض العين
ويكيل للعالم بعدة معايير
هدم البيوت وجرف خضر البساتين
عنها تغاضوا في تكتم وتستير
فعل اليهود بشعبنا عندهم زين
يسرهم نوح الثكالا المحاسير
اللي سلب حق الضعوف المساكين
صفوا بجنبه ودعموه بملايير
واللي يدافع عن حقوقه له اسمين
إرهابي ومجرم ولا له مناصير
بانت حقايق حقدهم والمضامين
هم الجناه وهم سبب كل تفجير
الرب يعلم والمخاليق دارين
حرب الصليب افتوبها جرج وبلير
وأكبر مصيبه قول بعض الموالين
سموا دمار بلادهم حرب تحرير
يا مناصرين المعتدي فالكم شين
صرتم حرس للمجرمين ونواطير
بالهون والحقران والذل راضين
حلف وخدم لأنصار عازر وشامير
صرتم لتنفيذ أمرهم مستعدين
وصرتم تبع للي أودعوكم شعاثير
يدعون للفتنة وللشر ناوين
من أجل تاقع بينكم حرب تطهير
والنصر للي لحرب الأشرار داعين
بادوا من جيوش المعادي طوابير
اللي اسقوا العدوان سم الثعابين
يثنون دون المحصنات الغنادير
دون العقيدة والكرامه مفادين
نواصر السنه أبطالٍ مغاوير
صيد الرجال المخلصين الميامين
الصالحين المصلحين المناعير
تذكّروا ياللي للأفعال ناسين
المجد يكتب بالصحايف تقارير
لا بد من يوم تميل الموازين
ويبين ذكر أهل الوجيه المسافير
القاف تم وكمّل البيت ستين
وصلوا على مرسال رب المقادير