للمرجلة قدوة,, وللعدل ميزان

هكذا يرى الجميع أمير منطقة الرياض سمو الأمير سلمان بن عبدالعزيز ,, قدوة في مواقفه النبيلة,, وميزان عدل اقنع العقول فاحبته القلوب.
والشاعر إلهاب بن عوض الوسيدي يخاطب طويق,, هذا المعلم البارز من معالم منطقة الرياض الجغرافية ليصل الى معالمها الانسانية والحضارية من خلال قصيدة جميلة تطرق فيها الى عدل حكامنا,, ورعايتهم الصادقة لحقوق الانسان كما حددتها شريعتنا الاسلامية اذ يقول:
يا طويق ياللي ما تغيرك الأزمان
ولا غيرت منزلك سود الليالي
اسمك بهضبة نجد للمجد عنوان
توصف على وصفك زحول الرجالي
مترامي الأطراف مشدود الأركان
في موقع تحسدك كل الجبالي
ذاك المكان اللي قريب لسلمان
الشامخ اللي يستحق الجلالي
هو الذي ميزك في ذكر الاحسان
وخلاك متعلي بروس العلالي
والا انت ضلع بنجد من عرض ضلعان
بهضاب نجد الشاسعة والسهالي
لكن جبل واللي بنا مجدك انسان
أمير نجد اللي بعد له مثالي
واصدق دليل لما ذكرته وبرهان
شوف الرياض اللي يفوق الخيالي
شهادة يا طويق من قلب ولسان
انك مقر المجد باول وتالي
من عهد أخو نوره الى وقتك الآن
مجد على مر السنين امتوالي
يا طويق قلب مدور الطيب ولهان
وده على شوفة كريم السبالي
بلغ تحياتي سلايل كحيلان
راع المواقف والفعول الجزالي
يا ما شرح صدر من الضيق مليان
بعد الهموم الكايده راح سالي
يمناه للي يطلب العون ميدان
يرخص من أجل المرجلة كل غالي
وله هقوة في وقت روغات الأذهان
يمتاز فيها عند مس الحبالي
واليا وقف بين السلاطين سلطان
اسم وفعل مافيه رد وجدالي
وان ثار من دافع غضب تقل بركان
منه الأسود يصير فيها جفالي
وللمرجله قدوة وللعدل ميزان
كامل ولله الوفا والكمالي
لو قلت للشعر امدحه قال خجلان
أخاف يقصر عن مديحه مجالي
الله يعز اللي حمو كل الأوطان
وأمن بها صيد الخلا بالمفالي
والشعب في ظل العلم عاشوا اخوان
ما فيه هذا اقصى وهذا اموالي
ماهو بحزب أصوات لفلان وفلان
بالسيف ما جتهم بخشم الريالي
من عقب ما يرقص بها كل شيطان
وبليس مع هبة هواها يلالي
تحولت واحة بساتين وجنان
وعماير تنطح خشوم الخيالي
يا مدعين الحفظ لحقوق الانسان
بنتم وبان الكذب والاحتيالي
وين العدالة عن كسوفا وشيشان
والسلب والتشريد والاحتلالي
حفظ الحقوق بدار طلقين الايمان
شرق وجنوب المملكة والشمالي
فهد وعبدالله عضيده وسلطان
اثقل عليها من رواس الجبالي
ونايف ليابان الحدث موقفه بان
رجل الأمن قدره على الراس عالي
دستورهم سيف مصقل وقرآن
أصدق بنود العدل والاعتدالي
الله يديم العز في ظل الايمان
آمين يا ربي عليك اتكالي
احفظ بلدنا من مقلبة الأديان
واجعل حماها طاهر ما ينالي
إلهاب بن عوض الوسيدي