قصيده الهوايه

ياالله يا المعبود ياعالي الشان
يالواحد اللي بالمخاليق والي
تنزل علينا الغيث من غر الأمزان
وتسقي الفياض اللي بها الدهر طالي
وتروى من الأمطار وتصير غدران
والعشب ينبت عقب وبل الخيالي
وشوف الفياض اللي لها القلب شفقان
برضٍ كساها العشب مثل الزوالي
ترعابه الذيدان من كل الألوان
اللي هواها شف قلبي وبالي
وصوت ام سالم بالطرب تعطي الحان
تلعب طرب في جو ماله مثالي
تبعد هموم القلب وتزيل الاحزان
والبال يصبح طول الايام سالي
أنا اشهد انها غايتي كل الازمان
شوف الخضار وشوف جوٍ خيالي
مع خوة أهل الطيب ذربين الأيمان
اللي رقو بالطيب في كل عالي
أهل الوفاء مافيه شكٍ ونكران
واهل الفعول الوافيات الجزالي
واختامها صلوا على نسل عدنان
نبينا اللي وامرٍ بالعدالي