يوم على الأمه يروع ذهوله

اعنف خبر ذاعوه في يوم الاثنين
يوم على الأمه يروع ذهوله
يوم سحابه حزن هز المسلمين
وكل الدول خيم عليها نزوله
الحزن اشوفه قدم ويسار ويمين
وبين الحنايا العوج نوخ ذلوله
لا بال يهدا لي ولا نامت العين
حتى طريقي ضاق عرضه وطوله
يوم اعلنوا باسوا خبر للملايين
موت المليك اللي رفع شان دوله
ضقنا وضاق بنا الفضا والله يعين
ما عاد باقي شي نقدر نقوله
غاب الزعيم وليلنا صار ليلين
وهذا القدر ما احد يغير ميوله
حارت خطاوينا وحنا قويين
الصمت خيم والمدامع عجوله
مرحوم يا رمز الوفا موفي الدين
يا كاسب الطولات في كل جوله
يا خادم البيتين ريف المساكين
يا رمزنا اللي ما تعدد فعوله
نفحات جوده طالت الهند والصين
وبسياسته كل الجميع شهدوا له
كم مؤتمر قاده بحكمه وتثمين
واليا انتهى من كلمته صفقوا له
بحماك يا فارض على عباده الدين
يالله تجيره من عذاب ينوله
لو غاب نصبر والصبر طيب وزين
ويبقى الوطن شامخ ولا احد يطوله