ناخ المطيه حط راسه ونامي سقفه سما والأرض من تحته فراش

عقب السفر ريّح ذلوله وهو ارتاح
وتعبت ذلوله والمسافه بعيده
يروح ليله مع نهاره بمرواح
ويسامر النجمات لحن وقصيده
وحنا بفضل الله جيوبٍ بمفتاح
مركب مريّح والمكينه جديده
مراكب الراحه بها الهم ينزاح
مع راحة الخاطر تراها رصيده
سليمان عبدالعزيز السنيدي - الرياض
نوّخ بعيره وانسدح حدّه النوم
هذي طريقتهم على طول الأيام
حطط عن البلها ترى يلحقك لوم
وهي تراها مثل ما تحس تنظام
هذي عطايا الله وترحم على الدوم
الواجب إنا نتبع دين الإسلام
علي رشيد الرشي - رياض الخبراء
في لهيبٍ يَبَّسِ شْفاهِ وْلَهَاه
والرّمِل أمٍّ نَعَت فَقْدِ الضنا
ما شكى الراعي مِنِ ظْروف الحياه
صابرٍ لو هو لقى همّ وْعَنا
ناقته أنسه وعونه بالفلاه
وقُوّةِ عْزومهْ سلاحٍ ما انثنى
نامِ مرهق والسما ناعم غطاه
وبالثرى عن طَيّب الفرش اغتنى
عبرةٍ للي الدّعه غاية هواه
ما حَدٍ حاز المعالي بالمُنى
عاش من يأكل ويشرب من شقاه
كلّ عسرٍ يعقبه خيرِ وْهنا
ناصر جمعان آل عوض - وادي الدواسر
راع المطيه شكله اليوم تعبان
نوّخ ذلوله ماسك خطام باديه
حتى المطيّه شكلها اليوم عطشان
يالله بخير مسيلٍ من مناشيه
خليف فهيد الحربي - الرياص
يالراعي اللي بالخلا لك رسومي
متحملٍ في البر خيره.. وجو ره
الله يعينك دام في شهر صومي
تطرد ورى ذودك ولو به خطوره
خالد ناصر المخيمر
مدّ النّظر بالبر ترعى عطايا الله
وجنب الذلول وخرجها نام راعيها
يا زين دوٍّ وسطه العين منهلّه
والنفس كم ميزات بالبر تدعيها
مع الأمان وجوّ محدٍ يملّه
ارتاح راع الوضح بوسعٍ مراعيها
والبل وهلها عشرةٍ دوم منجلّه
عشرة وجود الكل منهم مراعيها
والبر عند العيس متعه وفلّه
رعن شبول وسطها العين توزيها
ويالله يا غافر الذنب والزلّه
بغيثٍ به الرحمه وتخضر مراعيها
سعود عائش الحربي - جدة
هذي رحولٍ جاهزه شد وشداد
في مبركٍ ما فيه غير النسانيس
ارض خلا كل المواقف لها حداد
والجو حر لو تجيه العساعيس
ما ينزله يا صاحبي غير الاذواد
مع الرجال اللي تحط المتاريس
ولامن تذكرنا مواقيف الأجداد
سنين راحت ما تفيد الدفانيس
حمد عبدالله الوايلي - حوطة سدير
ناخ المطيه حط راسه ونامي
سقفه سما والأرض من تحته فراش
على ذلولٍ سيرها كالنعامي
وحليبها راعيه من جوع يعتاش يعتاش
ويبرد عطشها في المسير السنامي
وترعى نبات الأرض رطبٍ وقشقاش
لها تواريخٍ قديمه وأسمامي
يوم الكسافه مركب لكل طرّاش
سعود عبدالعزيز الهزاع - نعام
نرحب بمشاركاتكم الشعرية وما تلتقطه عدساتكم من الصور الهادفة والطريفة على إيميل الخزامى:
rb-khozama@alriyadh.com
ويا هلا..
صورة العدد السابق
Your browser does not support the video tag.