راع المطيّه خاشع في صلاته مؤمن وميقن يطلب الرب غفران

صف وتوجه قبلته مع ذلوله
في صحصحٍ مابه من الخلق مومي
اذّن وصلى بين ضلع .. وسهوله
خايف من الله يوم جمع العلومي
يا رب تغفر له وتحفظ ذلوله
وتعطيه من فضلك وخيرك يدومي
عبدالكريم النغيمشي - لوذة
في طاعة الرحمن اذّن وصلى
حوله رحوله وارسنه وطمئنّي
جوله مع البران حب يتسلى
والجو مغري .. والقماري تغنّي
امن وامانٍ .. والخلا ما يملي
من صد عنه يجيه وقتٍ يحنّي
علي الرشيد - رياض الخبراء
راع المطيّه خاشع في صلاته
مؤمن وميقن يطلب الرب غفران
فالديره اللي ممحله من نباته
من شافهاعافها راح زعلان
كم واحدٍ مثله تنكّد حياته
يبي الكلا والمي من شان ذِيدان
يالله تجيب الخير يارب هاته
من مدلهمٍ تالي الليل هتان
خليف فهيد الحربي - الرياض
يا محمد السويح عسى الرب ياقاك
أتحفتنا بالصوره اللي جميله
وياذا الغدير اللي لك النفس تهواك
نكشت على جالك نسوي عبيله
شكلك ينعوش والمكاشيت تنصاك
والراعي اللي منك يروي صميله
في وسط قاعٍ يهتني فيه ممشاك
وصوت أم سالم ما ندور بديله
خالد ناصر المخيمر - روضة سدير
الكل لا جا السيل أفراح وسرور
وشفنا العرب أفراح حزّت قدومه
والحمد لله بلادنا اليوم ممطور
أشوف راعي الذود زانت علومه
ومن طاع ربه ياجد الخير موفور
وهذي نعم يا عل ربي يدومه
محمد عبدالعزيز الخنيفر - أشيقر
المؤمن الصالح عسى فاله الخير
كبّر يصلي خاشعٍ في صلاته
صلى الفريضه ثم واصل عالسير
رابط ذلوله هي جداه .. وغلاته
الله يا عصرٍ مضى مختلف غير
يوم الفقر يوصل لهاه .. وشفاته
والحمد لله يومنا يشبع الطير
من فضل ربي زايدٍ في غناته
حمد عبدالله الوايلي - حوطة سدير
البر به من بهجة العين ما طاب
وأصل الشجاعة والوفا والمروا
والبر كله دايمٍ عطر وخضاب
ويخاطب الأنظار والقلب جوا
والبر كنه دايمٍ يرسل اعتاب
نسيتم أيامٍ مضت .. والأخوا
سعود عايش الحربي - جدة
اعقل توكل لا تهج المطيّه
فعل السبب مطلوب لوكنت فالفرض
في واديٍ كبّر لرب البريّه
سقفه سما والفرش من تحته الارض
يصلي لربه .. وطايع نبيّه
يخاف من يومٍ على الرب يعرض
بصلف المعيشه منثنى قيد نيّه
عن طاعة الله ما تعذر عن الفرض
سعود عبدالعزيز الهزاع - نعام
نرحب بمشاركاتكم الشعرية وما تلتقطه عدساتكم من الصور الهادفة والطريفة على إيميل الخزامى:
rb-khozama@alriyadh.com
ويا هلا..
صورة العدد (عدسة / عوض الشملاني)