وأنا على قبرك وهو جرف هيال

في كل يوم اليا بدت شمس المدينه للزوال
أرفع يديني للسماء واسخي بها وأفلها
وادعيك ياللي فوق عرشك في خشوع وفي ابتهال
في ساعة ما همني حقد العباد وغلها
ياولد عمي ياعسى الله يوردك حسن المئال
فالساعة اللي ماتبي حتى الخليلة خلها
الله يبيحك عن خطاك ويلهمك عند السؤال
والله يعدي روحك إليا جات ويسهل لها
يوم الأحد سته ربيع الأولي مال الضلال
وأمسيت لك في حفرة ياويل من حول لها
يوم الأحد وانا على قبرك وهو جرف هيال
غمضت ابخفي دمعتي عنهم وقمت أهلها
أبوك جنبي وأبنا عمك قدمنا والحال حال
لبنه نواسيها عليك ولبنة نشتلها
ودعت زولك يوم روّح واندفن تحت الرمال
لولا ضلوعي كان روحي ودعت محلها
هذاك رحت وماخذيت من السنين الا قلال
لكن عسى الخيره من كثار السنين بقلها
والله ما يقطع معاليقي وانا ماش احتمال
الا لا جات الذكريات.. تعلني و أعلها
كم مرة جيتك وانا ضايق ولا عندي ريال
وهمومي أكبر من طويق وتبتسم وتحلها
وانا بعد مثلك ليا من جيتني فيك أنفعال
أبرك واشيل حمولك اللي في متونك كلها
عيال عم وجدنا واحد وأسامينا مثال
وأفكارنا وحده وضحكتنا تجي في حلها
كان ودي انك تشوفني لاجيت في كل احتفال
ثم زمت من فوق الرجال بدقها وبجلها
أنا أدري أنه يفرحك لا شفتني في عال عال
لكن خذاك اللي عساك بجنته وبضلها
والله وسبع أمية نعم من طيب ذات وطيب فال
خفيف نفس وجلسته من جالسه ما ملها
وأخطي عليه ومابعد زعل علي ابن الحلال
يدري وش اللي فالقلوب ومايبي يفطن لها
يالله وانا اللي طالبك بالفال يقفاه العقال
في جنة تروي الكبود الضاميه وتبلها
ثم يالله الوالي ولا غير الله الوالي بوال
لك البقا واللي عقد روس الحبال يحلها