من الذاكرة

يا ناس ما عينٍ جفت غالي النوم
إلاَّ بها ما يطرد النوم عَنها
ولا يطوّح ونته كود مسقوم
ولا شفت حالٍ بالمرض كف عنها
واعرف ترى المخلوق معطى ومحروم
والنفس كل أسباب الأسباب منها
سويلم العلي
***
دنياك لو تضحك تراها بخافي
تِبْرمْ دواليب الشَّقا والتكاليف
إقطف منه من قبل ما العمر يافي
صيّور ما تقفي ركابك مواجيف
إلى حصل عِزٍّ مع الكيف كافي
ماني على الدنيا كثير التحاسيف
زيد الخوير
***
ياللي بضخم الجرم عينك مشقَّاه
ليَّاك تزهد بالرجال النحايف
الذيب كم ضخمٍ قنصه وتعشَّاه
والنِّحف ما عاب السيوف الرهايف
إن شفت لك خرفان ضانٍ مخصّاه
لا تكترب منها تراها خفايف
عبدالله بن صقيه
***
إلى عزمت فحط للرجل مرقاة
من خوف يدري بك حسودٍ ربادي
ولا تأخذ الدنيا خراصٍ وهقوات
يقطعك من نقل الصميل البرادي
لك شوفةٍ وحده وللناس شوفات
ولا واديٍ سيله يسنّد الوادي
عبدالله بن سبيّل