شعراء يسطرون نبض الحكمة

لشعر الحكمة قيمته الكبيرة ودوره البارز في مجتمعنا الشعبي فهو رسالة نصح وتوجيه ولغة تصحيح وتوضيح وهو دعوة للمكارم والخلق الحسن وهو تحذير من الوقوع في كل ماهو سيء وقبيح وشعرالحكمة دائما يرشدك إلى طريق الصواب ويجعلك تضع كل شيء في مكانه الصحيح من قول أو فعل من خلال حياتنا اليومية. وكل هذا يكون داخل إطار شعري جميل تصوره الجزالة في المعنى والقوة في اللفظ وتعكسه تجربة الشاعر ويسجله فكره وقلمه ومشاعره. شعر الحكمة كتب وأبدع فيه الكثير من شعراء الجزيرة العربية الشعبيين وأصبحت أبياتهم أمثالا وحكما تسير بها الركبان ويرددها الصغير قبل الكبير ورسخت أبياتهم في أذهان عشاق الشعر الشعبي ومحبيه جيلا بعد جيل ومن باب الإيمان بقيمة هذا الغرض من الشعر سوف نعرض للقارئ العزيزفي هذا العدد من مدارات شعبية بعض من نماذج شعر الحكمة لنخبة من الشعراء في وطننا الغالي:
من تابع المشراق والكن والذرا
يموت ما حاشت يديه الفوايد
الايام ما باقٍ بها كثر ما مضى
والاعمار ماللي فات منها بعايد
نعد الليالي والليالي تعدنا
الاعمار تفنى والليالي بزايد
راشد الخلاوي
يابو هوى لا تتبع الغي والطيش
اقضب عنان النفس واحذر غششها
النفس مثل الطفل تهوى القراقيش
وإبليس لي قرقش عليها دهشها
اعقل يديها بالعقل والكلابيش
واصبر عليها لو تموت بطفشها
ترى الهوى خيش هل الطيش تخييش
كم واحد زهرة شبابه نتشها
ماتنفعك بعدين ياليت أو ليش
اغنم حياتك يا السنافي وعشها
خالد بن سعود الكبير
ولا عندنا ياشعيل للعوج تعديل
مازال ممشاها على العدل أطعها
وإن شفتها قامت تجانف على الميل
بأردى ثمن عند أول السوم بعها
واستثن منها قومت ٍ بآخر الليل
في حزة ٍ كل ٍ يحب يهجعها
لا جاء لثلث الليل الآخر تراتيل
وقامت ملايكة الرضا قمت معها
في ساعة ٍ تكبيرها والتهاليل
يجنى ثمار عذوقها من زرعها
عبدالله بن عون
ابليس لولاه كل الناس بالجنة
لاكن يلعبنا راع التلاعيبي
يا شين بعض الأوادم لو ضحك سنه
يضحك بوجهي ويشذب في عراقيبي
واللي ليا غبت غوجه للطرد عنه
وجرد سيوفه عطيبات المضاريبي
هجرت كل الدروب اللي يمرنه
أخير لي من مجيه، عنه تجنيبي
ولو ما أقتدي في كتاب الله والسنة
خليت كلٍ على دينه يصلي بي
عبدالله بن زويبن الحربي
القسمة اللي في يمين المقادير
أقراه بالجبين شي محتومي
والعسر عند الله له كم تيسير
والصبر في بحر المصايب يعومي
عندي خبر ان الليالي معاشير
ولابد ما تزرق علينا السهومي
لعل الأحياء تذكر الميت بالخير
والخلق يفنى والله اللي يدومي
سعد بن حسين العمرو العتيبي
بعض العرب معرفته بالبدايه
خطرٍ يشيلك بالبدايه عن الأرض
طفره وللطفرات حد ونهايه
اما انتهت باالطول وإلا انتهت عرض
حق وحقيقه والدعايه دعايه
النافله ماهيب تجزي عن الفرض
صالح عبدالرحمن الناصر
لا تأخذ الدنيا خراصٍ وهقوات
يقطعك من نقل الصميل البرادي
لك شوفةٍ وحده وللناس شوفات
ولا واديٍ سيله يحدر بوادي
عبدالله بن سبيل
ياسعود وقت الرخا والعز مايبطي
خل الكبر واتبع المعروف ودروبه
لا تاخذك فلسفات العالم النفطي
وتقول قدر الرجل مرهون بجيوبه
والله مايفرق الأسود عن الحنطي
إلا بدينه وباأخلاقه وبأسلوبه
واللي يمن بجميله بعد مايعطي
مثل المطر فالبحر مايترك عذوبه
والكلمه الصادقه لوتجرح المخطي
احسن من الكذبه اللي تستر عيوبه
عبدالله عبيان اليامي
اثر الرياجيل تفرق بالمدى والعزوم
والطيب كايد وحزّات المواقف محكّ
احد ٍ على اطرف سبب ماعاد يقدر يقوم
واحد ٍ لو تسكّر الدنيا بوجهه ضحك
سلطان بن بتلا الحربي