يا عضد عبدالله ونايف هل الشأن

اللي ليا مني نصيته شفانا
للطيب في وجهه مواري وبرهان
هداج تيما اللي يروّي ضمانا
اخو فهد وأبو فهد طير حوران
مواقفه تبهج قلوبٍ حزانا
أكبر وفاء وفاك لاخوك سلطان
عساه في الجنة ويجبر عزانا
سلمان فيه الجود مقرون بقران
بحر العطاء اللي مد جوده سقانا
يضحك حجاجه في الشدايد بليهان
ويحل عقدات الحبال المتانا
فيه العدالة والصرامة والاحسان
رمز الوفا اللي في وفاه احتوانا
يا أمير ما مثلك على مر الأزمان
شخصيتك منها كسبنا وفانا
الله يعزك يا سلايل كحيلان
يا عزنا يا درعنا يا ذرانا
يا عضد عبدالله ونايف هل الشأن
يا درع موطنّا وحامي حمانا
مثل الجمل متنك من الحمل مالان
من رأس أبو تركي زعيم الكيانا
عبدالعزيز اللي دعا لخمس الأركان
وحّد ركون المملكة ما توانى
له حنكةٍ يرجح بها كل ميزان
خلّى قبايلها سوات الاخوانا
من الساحل الغربي ليا ساحل عمان
ساد العدل في كل حي ومكانا
وصار الوطن مضرب مثل بين الأوطان
صوب النجوم المرقبات اعتلانا
خلّى صحاري نجد جنة وريضان
وخلّى شعوب تلتجي في حجانا
ياالله عسى له جنة الخلد مسكان
ويدخل بساتينٍ بخضر الجنان
يا اخوان نورة يا طليقين الإيمان
يا عز دولتنا وقادة لوانا
حنا لكم وأنتم لنا سر وإعلان
والكم على طول الليالي ولانا
دون الوطن ما نستمع هرج عدوان
وعن هرج حساد العرب ما درانا
الشاعر/ نايف بن هندي بن حميد