غيبة شهور

في غربتي تميتها تسعة شهور
باليوم والساعة حسبت حسابها
غيبة شهور وكنها غيبة دهور
ومن لوعة الفرقا وكثر أتعابها
وحدي حزين وهاجس الفكر منثور
بنات فكري طولت بغيابها
دعيتها للفكر باحساس وشعور
وسقت من عمق الخفوق اركابها
بأبيات شاعر ما بها جبر وكسور
دون الوزن قيفان ما نرضى بها
فيها كسيت القاف تيجان بلور
قصيدتي بالنقد محدن عابها
بنيتها بالصدق ما تحمل الزور
يا بوي لك مني أخط اكتابها
في كل حرف صادق الحب مغمور
لوكان في اللهجة شديد اخطابها
من حيرتي أكتب سطر وأمسح سطور
من وين مطلعها وكيف أبدى بها
ما لي عذر يا بوي لو كنت معذور
وجيّتي لك ما تغلق بابها
أنا أعترف مخطي ومذنب ومقهور
مهما ظروف البعد كان أسبابها
طولت بالغيبة ونا شخص مجبور
عيشة بدار البعد ربي جابها
لو غبت ما بنسى وصاياك والشور
مسكتها يا بوي من جلبابها
أنا على خبرك ولا جيت محذور
نفسي لكسب الطيب دوم أرقى بها
في صحبة أهل الطيب والعز مسرور
مبعد عن الشبة ودرب أصحابها
ما لي مع أهل الطيش والكيف لي دور
ناس رذيلة ما طرقت أبوابها
رضاك هو قصدي هو الخير والنور
هو مبتغى نفسي وهو مطلابها
عن الوفى عاجز ولا فيه مقدور
لو شالتك عيني بوسط أهدابها
* شاعر سعودي