قصيدة حصرية للشاعر بندر بن صالح الحجي

لا عاد تنشدني ترا ما انت مجبور =محدن على نشدتك هذي بجابرك
لكن على كل حال مخطي ومعذور=ماضيك يشفع لك لو يخون حاضرك
أبشرك مبسوط والحال مستور=والحال عن مافيه فالحال يخبرك
والوقت في شرح التفاصيل دكتور=ان كان ما خبرك تعال أخبّرك
المبتدأ ماهو على الكسر مجرور =وحده من الثنتين والله مخيرك
ان ماقدرت تصير فاعل ولك دور=خلك فعل ماضي ولا احدن بمنكرك
وانا علي القاف منهي ومأمور=عليه أرتب فكرتي لين تبهرك
واسرح بفكري فالفضاء فوق وأدور=واتخيل إني في عربسات ادورك
شرقٍ عن الشعبه شمال عن الكور=والعرق عنك شمال ويزين خاطرك
على امتداد الوادي نخيل وقصور=تلقا بها من دهشتك مايحيرك
يا وش جرا فيها قبل عدة عصور=كنك على ساحل شواطي نيويورك
دارٍ بها التوحيد والحق منصور=يستوحش الباطل ويستوحش الشرك
لنا بها حيٍ من العشق ممطور=وألاّ من العشق اعتقد مايبشرك
ولنا بها دارٍ فدا وقفته دور=لو ماتكلم بالأحاسيس يشعرك
شامخ وهو في قبضة الحزن مأسور=شموخ ابن حثلين في قبضة الترك
عمار يا بيتٍ له سنين مهجور=لو كان نظرات العتب في نواظرك
على شبابيكك ندى الدمع منثور=ضاقت بها مدامعك في محاجرك
وأحس في جدرانك إحساس وشعور=ولك هيبة عندي وأجلّك وأقدرك
كنك تهرجني وخاطرك مكسور=تقول مهما كان مانيب عاذرك
تذكر زمان راح بالخير مذكور=قلت إيه مايحتاج تذكير خابرك
خابرك يوم أحلامنا مالها سور=على مدى ماينقطع فيه ناظرك
جهال نحسبها على كيفنا تدور=لين عركتنا في ميادينها عرك
ننوشه ما ناشه من العذق عصفور=ونروح وشداد المطيه على الورك
بندر بن صالح الحجي