صوت وصدى

اثنين ياطول انتظاري للاثنين=وياطول صبري بانتظارالثلاثة
دخلت وإياكم ورحتوا على وين=وانا صحيح ومابقلبي خباثة
وسكت شهر ٍ زل مع درب شهرين=مشي المهين اللي تحثه احثاثة
ان قلت شي اصبحت والناس زعلين=والى التزمت الصمت حسبت عباثة
العام ربع ٍ لي حشام ٍ مطيعين=واخلاقكم حلوة وفيها دماثة
واليوم وش جاكم عسى فالكم زين=الى مشينا في خطاكم لباثة
كم لي وانا رحال وانتم مقيمين=اهملت شغلي والدبش والحراثة
ومن القصيد انتجت عدة دواوين=وجا بالقريحة يالصريح إنفراثة
إن كان مالبيتوا إنداي عجلين=انا فصيح لسان مابه لواثة
يصحٌي إيقاعه الى شيل غافين=بسرد الكلام اللي بليا حداثة
وإن قيل هذا اللي زعمتم مربين=قلتوا قديم اسلوب صعب انبعاثه
لولا ابن راجح شال عودي من الطين=يمكن يصيبه من مطيحه خراثة
ذخر الرجال الطيبين العريبين=منهم ورث حلو الشمايل وراثة
وانتم هل الطالات مانتم رديين=لكن يحصل في نظركم طماثة
الصدى - عايض المقاطي
يازينها وان جت من الخشم للعين=تفوق وادان السحاب وهثاثه
من يقربك ياسيفنا يابو حدين=ماعاد يحسب للخطر واكتراثه
انا عليه دين ياصاحب الدين=والشعر من يفرق ذكوره واناثه
واليا كٌتب شعراّ بليا مضامين=يلزم من اصدور الرجال اجتثاثه
عرضّتها بلاقع جرد وسنين=تحتاج دعوات وصلاة استغاثه
اجيبها من وين من وين من وين=والبيت كملته وكملت اثاثه
حطيتني يابو هلا بين ناريين=حجزت كل ارقاق الارض وحثاثه
مير انفتحلي من ورى الباب بابين=وطلبت من عند الكريم الاغاثه
لو تزرع الزيتون في مشتل التين=كفاك عن راك الجنوب وكباثه
والبدو ياراعي البساتين صلفين=لو شفت ملبسهم عليه الرثاثه
وافين في كل الميادين وافين=ويميزون صقور نجد وبغاثه
وختامها يابن الخيار الكريمين=ردي يكفي عن ردود الثلاثه