السلام بلاش!

من العادات الأصيلة عندنا أنك إذا كنت محتارا بين كلمتين فغالبا راح تختار الكلمة اللي فيها كمية قهر أكثر للطرف الثاني، ولما تكون معزم مثلا تنهي محادثة مع أي شخص، تختار دائما تنهيها على مشكلة عشان يحس يجلس ضميره يعذبه، وأنك رحت زعلان وأنت أصلا رايح لأن أبوك فوق راسك ويقول لك روح جب غدا!
عندك مثلا، أحسن طريقة لأي بني آدم حاب يكسر حاجز الصمت مع أي بني آدم ثاني بشكل يقهره ويركب الغلط عليه من راسه لساسه يقول له «السلام بلااش» مع أنك لو لاحظت شوي، بتلاقي أن خوينا راعي الجملة العظيمة هذي وقع في نفس الخطأ.. ويا زين هذاك جمبه.. يعني ع الأقل هو ما سلم وباقي ساكت ومحترم الوضع، أما أنت يا بطل جاي ومدرعم وتدور حرش واحلى شي أنك تطالب بالسلام وأنت أصلا ما سلمت!
نرجع لخوينا.. لاحظ أنه ما قال لك «السلام سنة» مثلا، الرجال داخل عرض على الدراهم مباشرة، ولاحظ بعد أن كلمته معناها «لو كان السلام عليه رسوم مثلا كنت عذرتك على السكوت!» لكن الشي اللي ودي أسأله إياه، وبنفس المنطق حقه.. أنت أحد يدفع لك فلوس مثلا مقابل كل واحد تستفزه؟