نفسي اعرف وش يحس فيه خويك لما يعزمك على مناسبة موجودة برا الخريطة ولو انك راعي ليموزين من 40 سنة ما في أمل تعرف مكانها، ومن زين الطبايع يرسل لك الدعوة ولا فيها كروكي ولا شي.. واذا جينا لمرحلة الوصف بالتلفون تلاقيه يضيعك اكثر على أول لفة يمين خش معها يسار ورابع حرف تي يجيك روح معاه سيدا، وثاني مخرج ادخله، وثالث اشارة تقابلك اقطعها وتلاقينا في خامس بيت جنب التوقيف! ولأنك راعي واجب، فاكيد بتحاول مع جوجل إيرث يمكن يفزع لك لكنه بيقول لك «Testahbel ent? wesh darrani!!» وبتستحي تقول لخويك ان طريق الاستراحة اللي سويت فيها زواجك خلتني اوصل الخرج وارجع الرياض من المزاحمية! الأخ ما زال شايفني ماجلان، وبالتالي ما راح يتوقف عند العزايم والاستراحات اللي يصعب الاستدلال عليها بدون ما يكون مخك برعاية تقنية GBS، خصوصا انه راعي تخييم وفلة حجاج وشبة ضو.. وفي هالحالة السالفة ما بيكون فيها مخارج واشارت مرور ومديورات.. انت وقتها بتعتمد سلمك الله على النجم القطبي لأنك ماشي ومدرعم في صحرا والاخ يبيك تنتبه لدخلة الطعس اللي هو مخيم عليه.. واذا وصف لك اياه.. يطقها في وجهك ويحسسك انك من جنبها فعلا «يا خوي المكان واضح.. انا حاط علبة موية على طرف الشارع خش من عندها!».