سويت نفسي متطور ونمت بدري!

كنت في يوم من الأيام مسوي نفسي متطور ونمت بدري.. قلت ولو مرة بحياتي ما صير سعودي وأنام بدري عشان يصير لقهوة الصباح طعم.. المهم قعدت بدري.. قلت خلني اشوف أمريكا وشعب أمريكا هم بعد مثلي يصحون بدري.. تصدقون إحساس يهبل إنك زي أمريكا.. قمت أتفرج على قناة أمريكية وعندهم برنامج- ما لكم علي يمين- لو تجمعون كل قنوات العرب ومعهم كم دولة ما هم عرب بس بينهم وبين العرب نسابة.. هذولا ماخذين من هذولا.. هذا خواله من هذولاك.. هذولاك جدتهم من هذولا.. لبلبلا.. لبلبلا.. لبلبلا.. يعني الخ بالهاي كلاس! (مشوها.. توني متعلمها واستعرض) هالبرنامج ما يسويه إلا قناة لو جلس محمود سعد يفحط مية سنة ما طلع فيها.. ومو أي تفحيط.. لازم حافي وعلى زفلت طريق (إنكاس) خالد بن الوليد.. اللي البلدية ضاحكة على العالم ومسويته من حصى أسود بزعم أنه زفلت أصلي.. وكل بين متر ومتر إشارة مرور.. ما تدري هو شارع فيه إشارات والا إشارات فيها شارع.. المفروض يسمونه إشارات طريق إنكاس.. الله يصلح بلديات كل العالم.. ياخي ودي أعرف حقين تزفلت الشوارع ما قد سافروا برا وشافوا خلق الله وشلون يزفلتون بلدهم.. بس عاد احمدوا ربكم إن مالي كلمة بالبلدية.. كان أزفلت الدنيا كلها.. وربي ما خليكم تنامون شهر كامل من ريحة الزفلت اللي بكل مكان.. أطلع كل تريلات الزفلتة بارت تايم وهات يا تزفلت.. ومع هالحر والزفلت ترتفع حرارة البلد.. لين يقول الريس حقي.. يا أخي.. الولد هذا شغيل رقوه كبير خبراء الزفلتة.. يعني شفتوا اللي راكب التريلة يزفلت.. هذاك يسمونه السواق المزفلت.. اللي جالس بجنبه هو محاكيكم..
طبعا أكيد بكون متلطم واللي يبخششني ويرسل وراعينه يذبون علي من الشباك كم موية صحة وكم برتقالة خايسة قبل لا يذبونها قالوا نتحسن فيها.. راح أرفع رصيف بيتهم لين يدخل الزفلت حوشهم.. هذا إذا ما أزعجوني وراعينهم وقمت أراكض وراهم إن لحقت الأول يحذفني الثاني وإن لحقت الثاني يحذفني الأول وينتهي اليوم ما زفلت مترين.. يا ناس امسكوا وراعينكم خلوا الناس تزفلت.
هالبرنامج جعلني ما ذوق حزنكم.. جايبين خبر عن رجال مسوي نفسه رجل دين ومعه كتاب من كتبهم الضالة الله يهديهم وإلا يخششهم بصبة.. ونفتك من طفاستهم.. عاد يا شين (القوي) لا تطيفس. واطي بطنك واطي بطنك.. بعدين ما يطلع عليك إلا بوقت ما يمديك تهج ولا يمديك تنادي أحد.. مالك غير تسوي حالك مو فاهم الموضوع.. وحاول تقول أكثر من مرة (يا أخي الدنيا محكومة.. يا أخي الدنيا محكومة).. خذ كفين ولا عاد تواجهه.. وقل لنفسك الرجال معه حق وماني فاضي أنسجن عشان واحد (أزعر).. زبدة الهرج إن برنامج (صباح الخير أمريكا) الله لا يصبحهم بالخير.. يطلعون فيها لقطات ناس يقرأ عليهم من هالكتاب ويقومون يصارخون. وجابوا لقاء مع وحده تحمد الله طبعا بالإنجليزي وتقول: إن هالرجال طلع الجني منها وفعلا لما كان يقرأ عليها كانت تسبه وتلعنه بصوت كنه يشبه صوت الجني (مع إني ما عرف صوت الجني.. بس من الخرعة.. حسيت إنه صوت جني).. المهم إن الغرب اعترف إن فيه جن.. جعلهم بالمارد اللي يخلي كل واحد منهم يشوف الثاني أسد يبي ياكله ويقضون اعمارهم ركض.. هاجين تقول مقروصين.. ما يردهم غير جمارك (المكسيك).