كباري وأنفاق يا أمانة

بالبلدي الفصيح

أنا عارف انه الحبايب في أمانة جدة شايلين مني شويه وحيقولوا بينهم وبين نفسهم ولد الحلواني دا ما يبغى يسيبنا في حالنا ويروق ما يمر أسبوع إلا وهوه كاتب مقال عننا. صدقوني يا حبايب ما بكتب إلا للمصلحة العامة، وإن شاء الله يكون مقالي اليوم خفيف ولطيف عليهم..
ايش دا اللي جايبو معاك ياسيدي، بطحة وحجر زلط واسمنت، انت ناوي تبني الأرض اللي اشتريتها من كم سنة؟ ، هههههه ضحكتيني الأرض هادي خليها لأحفاد أحفادي لما يكبروا يبنوها لأنه الخدمات في هادي الأرض يبغالها بالميت 15 سنة يعني بعد ما أكون أنا وانتي صرنا بترول، قال ابني الأرض قال .. طب وليه دا كلو الاسمنت والبطحه؟، هدا يا ستي عشان الفيران اللي بهدلتنا وبهدلت كل الحي رغم انه الحي ماله 15 سنة لكن الفيران لعبت في حسبتوو لعب، عشان كدا أنا اشتريت هادي البطحة والاسمنت ليا وللجيران لانهم هما كمان بيشتكوا من هادي الفيران اللي بهدلت الدور الأرضي من عمايرهم لانه هادول الفيران سووا كباري وأنفاق في كل الأدوار الأرضية للعماير بس تصدقي انه المقاول قصدي الفار اللي ماسك مشاريعهم فار بيشتغل بذمة وضمير يعني لا لف ولا دوران ولا نهب، والفيران بتسوي أنفاق وكباري على مستوى عالي من المواصفات حتى لو مطرت المطرة حتلاقي الكباري والأنفاق اللي صممتها ناشفة .. طب ياسيدي كيف نقدر نقضي عليها؟ والله ياستي جواب سؤالك دا عند الأمانة. لكن المصيبة انه كل ما نحاربها ترجع تاني وهادي البطحة والاسمنت جبتها عشان نقفل هادي الكباري والأنفاق اللي سوتها، والمصيبة الكبيرة ياستي انه الأمانة بسلامتها جالسة في المدرج تتفرج .. يا أمانة جدة الفيران جابت لأهل جدة الجنان في كل حي وفي كل شارع وفي كل زقاق موجودة وجالسة بتتوالد وكل يوم بتزيد .. يا أمانة جدة الفيران في البلد بالملايين ولمعلوميتكم الفيران تحمل أربع مرات في السنة وتخلف من 6 إلى 18 فأر في المرة الوحدة وهاتوا الآلة الحاسبة واحسبوها يا حبايب.. وشوية أسمع زعيق وصريخ فتو وجري زي السيخ على المطبخ واللي بيسموه أهل البلد والعتقية زي (بالمركب) ايش فيه فتو؟، فار يبويا فار ، فتحت شباك المنور إلا ودا يقول لي سلمي على أبو فتو كتييير السلام، وقوليلو يبلغ سلامنا للأمانة ويقول لهم كمان نحنا قاعدين على قلوبكم طالما هما ساكتين علينا وطالما مافي مكافحة لنا ولا صرف صحي بالمشمش لو تركناكم ونجوم السماء أقرب لهم .. وعيشوا كتييييييير تشوفوا كتيييييير زي ما بتقول يبو فتو..
للتواصل أرسل sms إلى 88548 الاتصالات ,636250 موبايلي, 737701 زين تبدأ بالرمز 150 مسافة ثم الرسالة
abofatoo@hotmail.com