حروب الغرام

من عقب ليل القصايد والغزل والهيام!
طفل المشاعر براه الشوق قبل ايحبي!
ذبيت همي على بعضي وبعضي حطام!
واستوطنتني جروح(ن) نزفها ضاق بي!
غربة مميتة بروحي والبشر في زحام!
والدرب ياضيق بابه مل منه اتعبي!
حل اغتيال المشاعر في مكان السلام!
واستنكرته الحنايا مثل شجب أعربي!
ياشين ضعف الإرادة في حروب الغرام!
ويامر طعم الهزيمة من عدو غبي!
سقت امنياتي لعينك وانت جوك عسام!
كنت أحسب أن الغرام يزين به مشربي!
حلمت بك قبل أشوفك وانتشى بك حمام!
واعطيتها لك رسالة من جنون أشغبي!
وردت حمامات شوقي كاسله بالحيام!
لأنك قسيت بردودك واستثرت اعتبي!
حطمت حلم الطفولة وانتحر ألف عام!
ضميتها لك بصدري وانت توك صبي!
كنت اشتهي شيطنتك ولا أخاف الملام!
وارقب يدينك وهي تحتاج قيظ الهبي!
بين المشاعر وروحي واحتياجك خصام!
ازريت لافهم غيابك والوجع طال بي!
وعييت لا ألقى لجرحك في حياتي ختام!
كنه معلق بثوبي أو بظل اهدبي!
ياوقت ارفق بجرحي لاكساه الظلام!
والنار شبت لظاها والضلوع احطبي!
والبدو دقوا وتدهم في صميم العظام!
وعروق قلبي بيدك ماخذنها سبي!
واليوم شفني أسيره بعد موت الهيام!
حلت بروحي ثلاث احتاج ودي وأبي!.
تاج الغرور